ഒന്റാരിയോ: ഫ്രാൻസിന് പിന്നാലെ കാനഡയിലും ഭീകരാക്രമണം. പടിഞ്ഞാറൻ കാനഡയിലെ ക്യുബെക്കിലാണ് ആക്രമണം നടന്നത്. സംഭവത്തിൽ രണ്ട് പേർ കൊല്ലപ്പെടുകയും 5 പേർക്ക് പരിക്കേൽക്കുകയും ചെയ്‌തു. കാനഡയിലെ ഫ്രഞ്ച് ഭൂരിപക്ഷ പ്രദേശമാണ് ക്യുബെക്.
Also Read: റാഡിക്കല്‍ ഇസ്‌ലാമിസ്‌റ്റുകൾ എല്ലാവര്‍ക്കും ഭീഷണി; ഫ്രഞ്ച് പ്രസിഡണ്ട്
മൂർച്ചയുള്ള ആയുധവുമായി എത്തിയ ഒരാൾ പ്രദേശത്തെ പാർലമെന്റ് ഹില്ലിന് സമീപം ആളുകളെ ആക്രമിക്കുകയായിരുന്നു. 20 വയസ് തോന്നിക്കുന്ന ആളാണ് ആക്രമണം നടത്തിയതെന്ന് ക്യുബെക് സിറ്റി പോലീസ് മേധാവി എറ്റിയെൻ ഡോയൻ മാദ്ധ്യമങ്ങളോട് പറഞ്ഞു. പ്രതിയെ പോലീസ് അറസ്‌റ്റ് ചെയ്‌തിട്ടുണ്ട്‌. ആക്രമണത്തിൽ പരിക്കേറ്റവരെ ആശുപത്രിയിലേക്ക് മാറ്റി. അക്രമിയെ കുറിച്ച് കൂടുതൽ വിവരങ്ങൾ കനേഡിയൻ പോലീസ് പുറത്ത് വിട്ടിട്ടില്ല. സംഭവവുമായി ബന്ധപ്പെട്ട് അന്വേഷണം പുരോഗമിക്കുകയാണെന്നും അധികൃതർ വ്യക്‌തമാക്കി.
അതേ സമയം, ക്യുബെക്കിൽ പോലീസ് സുരക്ഷ വർധിപ്പിച്ചിരിക്കുകയാണ്. ആളുകൾ ജാഗ്രത പാലിക്കണമെന്ന് പ്രാദേശിക അധികാരികൾ മുന്നറിയിപ്പ് നൽകി.
