എറണാകുളം: തൃക്കാക്കര നിയമസഭാ മണ്ഡലത്തിൽ നിന്നും ഉപതിരഞ്ഞെടുപ്പിൽ വിജയം നേടിയ കോൺഗ്രസ് പ്രതിനിധി ഉമാ തോമസ് ഇന്ന് എംഎൽഎ ആയി സത്യപ്രതിജ്ഞ ചെയ്യും. ഇന്ന് രാവിലെ 11 മണിയോടെ സ്പീക്കറുടെ ചേംബറിലാണ് സത്യപ്രതിജ്ഞ ചടങ്ങ് നടക്കുക. എംഎൽഎ ആയിരുന്ന പിടി തോമസിന്റെ വിയോഗത്തെ തുടർന്ന് തൃക്കാക്കര മണ്ഡലത്തിൽ നടത്തിയ ഉപതിരഞ്ഞെടുപ്പിൽ 25,016 വോട്ടിന്റെ ഭൂരിപക്ഷം നേടിയാണ് അദ്ദേഹത്തിന്റെ ഭാര്യ കൂടിയായ ഉമാ തോമസ് വിജയം നേടിയത്.
പതിനഞ്ചാം കേരള നിയമസഭയിലെ കോണ്ഗ്രസിന്റെ ഏക വനിതാ എംഎല്എ എന്ന പ്രത്യേകതയും ഉമാ തോമസിന് ഉണ്ട്. 2011ൽ ബെന്നി ബഹനാൻ നേടിയ 22,406 വോട്ടിന്റെ ഭൂരിപക്ഷമാണ് ഉമ തിരുത്തിയത്. പിടി തോമസ് 2016ൽ 11,996 വോട്ടിന്റെയും 2021ൽ 14,329 വോട്ടിന്റെയും ഭൂരിപക്ഷമാണ് തൃക്കാക്കരയിൽ നിന്നും നേടിയത്.
കൂടാതെ ഈ സഭയിലെ കോണ്ഗ്രസിന്റെ ആദ്യ വനിതാ എംഎല്എയും യുഡിഎഫ് രണ്ടാമത്തെ വനിതാ എംഎല്എയുമാണ് ഉമാ തോമസ്. വടകരയില് മത്സരിച്ചു വിജയിച്ച കെകെ രമയാണ് നിലവില് പ്രതിപക്ഷ നിരയിലെ ഏക വനിതാ എംഎല്എ.
Read also: സംസ്ഥാനത്ത് ഇന്ന് മുതൽ കാലവർഷം കനക്കും; ശക്തമായ മഴക്ക് സാധ്യത