കണ്ണൂർ: മുസ്ലിം ലീഗ് കണ്ണൂർ ജില്ലാ സെക്രട്ടറി അബ്ദുൾ കരീം ചേലേരിക്കെതിരെ വിജിലൻസ് കേസെടുത്തു. കമ്പിൽ എൻആർഐ റിലീഫ് കോ-ഓപ്പറേറ്റീവ് സൊസൈറ്റിയിൽ വൻ ക്രമക്കേട് നടത്തിയതിനാണ് കേസെടുത്തിരിക്കുന്നത്. വിജിലൻസ് ഡയറക്ടറുടെ നിർദ്ദേശ പ്രകാരമാണ് കേസെടുത്തിരിക്കുന്നത്.
സൊസൈറ്റിയുടെ മറവിൽ സഹകരണ സംഘം ഉണ്ടാക്കി മണൽ വാരിയതിൽ ലക്ഷകണക്കിന് രൂപയുടെ ക്രമക്കേട് നടത്തിയെന്നാണ് കേസ്. 43 ലക്ഷം രൂപയാണ് തട്ടിപ്പ് നടത്തിയത്. സംഭവത്തിൽ സെക്രട്ടറി ഉൾപ്പടെ പത്ത് പേർക്കെതിരെയും കേസെടുക്കാനാണ് വിജിലൻസ് ഡയറക്ടറുടെ നിർദ്ദേശം.
അതേസമയം, സഹകരണ വകുപ്പ് നടത്തിയ അന്വേഷണത്തിലും സൊസൈറ്റിയിൽ വൻ ക്രമക്കേട് കണ്ടെത്തിയിരുന്നു. സംഭവത്തിൽ കൂടുതൽ അന്വേഷണം നടത്താനാണ് വിജിലൻസിന്റെ തീരുമാനം.