കൊച്ചി: ചികിൽസ തേടിയെത്തുന്ന രോഗികളോട് പോലും മതം ചോദിക്കുന്ന വ്യവസ്‌ഥകൾക്ക് എതിരെ രൂക്ഷ വിമർശനവുമായി സംവിധായകൻ ഖാലിദ് റഹ്‌മാൻ. പരിശോധിക്കാന്‍ എന്തിനാണ് മതം ചോദിക്കുന്നതെന്നാണ് കൊച്ചി മെഡിക്കല്‍ ട്രസ്‌റ്റ് ആശുപത്രിയിലെ രജിസ്‌ട്രേഷന്‍ ഫോം ഫേസ്ബുക്കിൽ പങ്കുവെച്ച് അദ്ദേഹം ചോദിച്ചത്.
ഖാലിദ് റഹ്‌മാന്റെ പേരില്‍ പൂരിപ്പിച്ച രജിസ്‌ട്രേഷന്‍ ഫോമാണ് ഫേസ്ബുക്കിൽ പങ്കുവെച്ചിരിക്കുന്നത്. മതം എന്ന കോളത്തില്‍ ‘ഇല്ല’ എന്നാണ് അദ്ദേഹം എഴുതിയിരിക്കുന്നത്. എന്തിനാണ് ഒരു ആരോഗ്യ സ്‌ഥാപനം പരിശോധനക്ക് മുമ്പ് മതം ചോദിക്കുന്നത്? മെഡിക്കല്‍ ട്രസ്‌റ്റ് ഹോസ്‌പിറ്റൽ, ലജ്‌ജാകരം’, എന്നാണ് ഖാലിദ് റഹ്‌മാൻ കുറിച്ചത്.
ഖാലിദ് റഹ്‌മാന് പിന്തുണയറിയിച്ച് നിരവധി പേരാണ് പോസ്‌റ്റിന് താഴെ കമന്റ് ചെയ്യുന്നത്. ആശുപത്രികളില്‍ മതം ചോദിക്കുന്നതിനെതിരെ നേരത്തെയും വിമര്‍ശനങ്ങള്‍ ഉയര്‍ന്നിരുന്നു.
Most Read: വിയ്യൂർ ജയിൽ സൂപ്രണ്ടിന് കാരണം കാണിക്കൽ നോട്ടീസ്
