ഷാജി അസീസ് സംവിധാനം ചെയ്യുന്ന ‘വൂള്‍ഫി’ന്റെ ചിത്രീകരണം ആരംഭിച്ചു. അര്‍ജുന്‍ അശോകന്‍, സംയുക്‌ത മേനോന്‍, ഷൈന്‍ ടോം ചാക്കോ എന്നിവര്‍ പ്രധാന കഥാപാത്രങ്ങളായി എത്തുന്ന ചിത്രം കര്‍ശന കോവിഡ് പ്രോട്ടോക്കോള്‍ പാലിച്ചാണ് പെരുമ്പാവൂരില്‍ ചിത്രീകരണം ആരംഭിച്ചത്. ജി ആര്‍ ഇന്ദുഗോപന്‍ തിരക്കഥയൊരുക്കുന്ന ഈ ചിത്രം ദാമര്‍ സിനിമയുടെ ബാനറില്‍ സന്തോഷ് ദാമോദരനാണ് നിര്‍മ്മിക്കുന്നത്.
‘ഷേക്‌സ്‌പിയര്‍ എംഎ മലയാളം’, ‘ഒരിടത്തൊരു പോസ്‌റ്റുമാന്‍’ എന്നീ ചിത്രങ്ങള്‍ക്ക് ശേഷമുള്ള ഷാജി അസീസിന്റെ മൂന്നാമത്തെ സംവിധാന സംരംഭമാണ് വൂള്‍ഫ്. ഷേക്‌സ്‌പിയര്‍ എംഎ മലയാളം എന്ന ചിത്രത്തില്‍ തിരക്കഥ – സംവിധാന പങ്കാളിയായാണ് ഷാജി അസീസ് സ്വതന്ത്ര സംവിധാനത്തിലേക്ക് കടന്നത്. കൂടാതെ ഏറെ ജനപ്രീതി നേടിയ ‘എം80 മൂസ’ എന്ന സോഷ്യല്‍ സറ്റയര്‍ ടീവി സീരിയലിന്റ സംവിധാനവും ഇദ്ദേഹമായിരുന്നു.
ഫായിസ് സിദ്ദീഖാണ് വൂള്‍ഫിന്റെ ഛായാഗ്രഹണം. ഹരിനാരായണന്റെ വരികള്‍ക്ക് രഞ്‌ജിന്‍ രാജ് സംഗീതമൊരുക്കുന്നു. ഇര്‍ഷാദ്, ജാഫര്‍ ഇടുക്കി തുടങ്ങിയവരും ചിത്രത്തില്‍ പ്രധാന വേഷങ്ങളില്‍ അഭിനയിക്കും.
National News: കശ്‍മീരിനെ ചൈനയിലാക്കി; ട്വിറ്ററിനെതിരെ പ്രതിഷേധം
