തിരുവനന്തപുരം: വനിതാ ദിനത്തോടനുബന്ധിച്ച് സംസ്‌ഥാനത്തെ ട്രോമ കെയർ പദ്ധതിയുടെ ഭാഗമായ ‘കനിവ് 108‘ ആംബുലന്‍സ് സര്‍വീസ് കണ്ട്രോള്‍ റൂമിന്റെ നിയന്ത്രണം ഏറ്റെടുത്ത് വനിതാ ഓഫീസർമാർ. കണ്ട്രോള്‍ റൂം മാനേജറുടേത് ഉള്‍പ്പടെ കനിവ് 108 ആംബുലന്‍സ് സര്‍വീസിന്റെ പൂര്‍ണ്ണ നിയന്ത്രണവും വഹിച്ചത് വനിതാ എമര്‍ജന്‍സി റെസ്‌പോൺസ് ഓഫീസര്‍മാർ ആയിരുന്നു.
രാവിലെ തന്നെ കണ്ട്രോള്‍ റൂം മാനേജരുടെ ചുമതല ഏറ്റെടുത്ത ടീം ലീഡര്‍ കാര്‍ത്തിക ബിഎസിന്റെ മേല്‍നോട്ടത്തിലാണ് കണ്ട്രോള്‍ റൂമിന്റെ പ്രവര്‍ത്തനങ്ങള്‍ നടന്നത്. 18 വനിതാ എമര്‍ജന്‍സി റെസ്‌പോൺസ് ഓഫീസര്‍മാരാണ് ഇവർക്ക് കീഴിൽ സംസ്‌ഥാനത്ത് ഇന്ന് 316 ‘കനിവ് 108‘ ആംബുലന്‍സുകളുടെയും നീക്കങ്ങള്‍ നിയന്ത്രിച്ചത്.
കൺട്രോള്‍ റൂമിലേക്ക് വരുന്ന ഓരോ അത്യാഹിത വിളികളുടെയും വിവരങ്ങള്‍ ശേഖരിച്ച ഇവർ ആധുനിക സംവിധാനങ്ങളുടെ സഹായത്തോടെ ആ പ്രദേശത്തിന് സമീപമുള്ള കനിവ് 108 ആംബുലന്‍സുകള്‍ വിന്യസിച്ചു. വനിതാ ദിനത്തിന്റെ ഭാഗമായാണ് കൺട്രോൾ റൂമിന്റെ പ്രവർത്തനങ്ങൾ വനിതാ ഓഫീസർമാർ ഏറ്റെടുത്തത്.
Read Also: ബിജെപിയെ തോൽപ്പിക്കണം; കർഷക സമരക്കാർ ബംഗാളിലേക്ക്
