കോഴിക്കോട് : ജില്ലയിലെ താമരശ്ശേരിയിൽ നിരോധിത പുകയില ഉൽപ്പന്നങ്ങളുമായി 2 പേർ അറസ്റ്റിൽ. താമരശ്ശേരി ചുങ്കം ഇരുമ്പിൻ ചീടൻ കുന്ന് താഴ്വാരത്ത് ചാലുമ്പാട്ടിൽ അഷറഫ്(42), ചുങ്കം കമ്മട്ടിയേരിക്കുന്ന് ഷാജി(39) എന്നിവരാണ് അറസ്റ്റിലായത്. ഇവരുടെ പക്കൽ നിന്നും 3 ചാക്ക് നിരോധിത പുകയില ഉൽപ്പന്നങ്ങൾ പോലീസ് പിടിച്ചെടുത്തു.
കർണാടകയിൽ നിന്നും പച്ചക്കറി കയറ്റി വന്ന വാഹനത്തിൽ ഒളിപ്പിച്ചാണ് ഇവർ പുകയില കടത്താൻ ശ്രമിച്ചത്. അവിടെ നിന്നും 3 രൂപ മുതൽ 10 രൂപ വരെയുള്ള ഉൽപ്പന്നങ്ങൾ കേരളത്തിൽ എത്തിച്ച ശേഷം 50 രൂപക്കാണ് വിൽപന നടത്തുന്നതെന്ന് പോലീസ് വ്യക്തമാക്കി.
താമരശ്ശേരി സിഐ മുഹമ്മദ് ഹനീഫയുടെ നേതൃത്വത്തിൽ എസ്ഐമാരായ ശ്രീജേഷ്, സുരേഷ്, അജിത്, സീനിയർ സിപിഒ സൂരജ്, സിപിഒമാരായ ജിലു സെബാസ്റ്റ്യൻ, ഷൈജൽ, ലേഖ, എംഎസ്പിക്കാരായ സുധീഷ്, അജിത് എന്നിവർ ചേർന്നാണ് പ്രതികളെ പിടികൂടിയത്.
Read also : ടൗട്ടെ ഗുജറാത്ത് തീരത്തേക്ക്; കേരളത്തിൽ ഇന്നും മഴ കനക്കും; ജാഗ്രത