തിരുവനന്തപുരം: കെഎസ്ആർടിസിക്ക് അടിയന്തിര സഹായധനമായി 30 കോടി രൂപ കൂടി അനുവദിച്ചതായി ധനമന്ത്രി കെഎൻ ബാലഗോപാൽ അറിയിച്ചു. ഈ മാസം കെഎസ്ആർടിസിക്ക് വിവിധയിടങ്ങളിലായി ആകെ 201 കോടി രൂപയാണ് അനുവദിച്ചിട്ടുള്ളത്. നടപ്പ് സാമ്പത്തിക വർഷം നാല് മാസ കാലയളവിൽ 750 കോടി രൂപയാണ് സഹായമായി നൽകിയത്.
കെഎസ്ആർടിസിയിൽ 26ന് മുൻപ് ശമ്പളം നൽകണമെന്നും സർക്കാർ ഇതിന് നടപടി എടുക്കണമെന്നുമായിരുന്നു കഴിഞ്ഞ ദിവസം ഹൈക്കോടതി നിർദ്ദേശിച്ചത്. ഇതുവരെയായി രണ്ടാം ശമ്പള ഗഡു കൊടുക്കാൻ കഴിഞ്ഞിട്ടില്ല. ധനവകുപ്പ് നൽകാനുള്ള 80 കോടി ഉടനെ നൽകി ഹൈക്കോടതി നിർദ്ദേശം പാലിക്കണമെന്ന് ആവശ്യപ്പെട്ട് ഇന്നലെയും മന്ത്രി ആന്റണി രാജു ധനമന്ത്രിക്ക് ഫയൽ കൈമാറിയിരുന്നു.
ശമ്പളത്തിനും പെൻഷനുമായി ഒരു മാസം 120 കോടി രൂപയാണ് കെഎസ്ആർടിസിക്ക് വേണ്ടത്. സ്‌ഥിരമായി സാമ്പത്തിക സഹായം കെഎസ്ആർടിസിക്ക് നൽകാമെന്ന് സർക്കാർ പറഞ്ഞിട്ടില്ലെങ്കിലും സഹായം നൽകുന്നുണ്ടെന്ന് കഴിഞ്ഞ ദിവസം ധനമന്ത്രി പറഞ്ഞിരുന്നു.
Most Read: ഗ്യാന്‍വാപി മസ്‌ജിദ്; ആർക്കിയോളജി വകുപ്പിന്റെ സർവേക്ക് നാളെ വരെ സ്‌റ്റേ
