പാലക്കാട്: വടക്കാഞ്ചേരിയിൽ ലോറിയിൽ നിന്ന് 51 കിലോ കഞ്ചാവ് പിടികൂടി. സംഭവത്തിൽ രണ്ടു പേരെ കസ്റ്റഡിയിൽ എടുത്തു. ചാലക്കുടി മുരിങ്ങൂർ ആറ്റപ്പാടം സുനു ആന്റണി (28), സുൽത്താൻ ബത്തേരി പടിചിറ ദേവർഗദ സ്വദേശി നിഖിൽ ഉലഹന്നാൻ (29) എന്നിവരെയാണ് എക്സൈസ് വകുപ്പ് കസ്റ്റഡിയിൽ എടുത്തത്. ദേശീയ പാത വടക്കാഞ്ചേരി ടൗണിന് സമീപം റോയൽ ജങ്ഷൻ ഭാഗത്ത് സർവീസ് റോഡ് വഴി ചെടികൾ കയറ്റി പോകുന്ന ലോറിയിൽ ഇവർ കഞ്ചാവ് ഒളിപ്പിച്ച് കടത്തുകയായിരുന്നു.
രഹസ്യ വിവരത്തെ തുടർന്ന് എക്സൈസ് സ്റ്റേറ്റ് എൻഫോഴ്സ്മെന്റ് സ്ക്വാഡ് ലോറി തടഞ്ഞ് നടത്തിയ പരിശോധനയിൽ ആണ് 51 കിലോ തൂക്കമുള്ള കഞ്ചാവ് പാക്കറ്റുകൾ കണ്ടെത്തിയത്. പ്രതികളെയും ലോറിയും എക്സൈസ് സംഘം കസ്റ്റഡിയിൽ എടുത്തു. തുടർ നടപടികൾക്കായി പ്രതികളെയും കഞ്ചാവും ലോറിയും ആലത്തൂർ എക്സൈസ് സിഐക്ക് കൈമാറി.
Read Also: കുട്ടികൾക്കെതിരായ അക്രമങ്ങളിൽ വർധന; സംസ്ഥാനത്ത് 5 മാസത്തിനിടെ 1,639 കേസുകൾ