തിരുവനന്തപുരം : സംസ്ഥാനത്ത് അഭയകിരണം പദ്ധതിക്ക് 99 ലക്ഷം രൂപയുടെ ഭരണാനുമതി നല്‍കിയെന്ന് ആരോഗ്യവകുപ്പ് മന്ത്രി കെ കെ ശൈലജ. അഭയസ്ഥാനം ഇല്ലാത്ത വിധവകള്‍ക്ക് അഭയം നല്‍കുന്ന ബന്ധുക്കള്‍ക്ക് പ്രതിമാസം ധനസഹായം നല്‍കുന്നതിനാണിത്.
സമൂഹത്തില്‍ ആരും സംരക്ഷിക്കാനില്ലാതെ, അഭയസ്ഥാനമില്ലാതെ കഴിയുന്ന വിധവകള്‍ക്ക് കുടുംബചുറ്റുപാടും, സംരക്ഷണവും നല്‍കുന്ന ബന്ധുക്കള്‍ക്ക് പ്രതിമാസം ധനസഹായം നല്‍കുന്ന പദ്ധതിയാണ് അഭയകിരണം. പ്രതിമാസം 1000 രൂപയാണ് ഈ പദ്ധതി പ്രകാരം വിധവകള്‍ക്ക് അഭയം നല്‍കുന്ന കുടുംബത്തിലെ പൗരന് നല്‍കുന്നത്. 11 മാസം വിതരണം ചെയ്യാനുള്ള തുകയാണ് ഇപ്പോള്‍ അനുവദിച്ചിരിക്കുന്നത്. നിലവിലെ ഗുണഭോക്താക്കള്‍ ഉള്‍പ്പെടെ 2020 – 2021 വര്‍ഷം ഈ പദ്ധതിയില്‍ ഉള്ള 900 ഗുണഭോക്താക്കള്‍ക്ക് ആയിരിക്കും ഇത് വിതരണം ചെയ്യുക.
