തിരുവനന്തപുരം: എല്ലാ നിയമസഭാ മണ്ഡലങ്ങളിലും ഓഗസ്റ്റ് 14 മുതൽ ഓണച്ചന്തകൾ ആരംഭിക്കുമെന്ന് അറിയിച്ച് മന്ത്രി ജിആർ അനിൽ. ഓണക്കാലത്തെ വരവേൽക്കാൻ സംസ്ഥാനത്തെ പൊതുവിതരണ സംവിധാനം സജ്ജമാണെന്ന് അറിയിച്ച മന്ത്രി തിരുവനന്തപുരം കേന്ദ്രമാക്കി സപ്ളൈകോ ഓൺലൈൻ വിപണനം ആരംഭിക്കുമെന്നും പറഞ്ഞു.
‘ഓണകിറ്റിൽ 17 ഇനങ്ങൾ ലഭ്യമാക്കും. സംസ്ഥാനത്തെ കർഷകരുടെ ഭക്ഷ്യ ഉൽപന്നങ്ങൾ കൂടി കിറ്റിൽ ഉൾപ്പെടുത്തും. തിരുവനന്തപുരം കേന്ദ്രമാക്കി സപ്ളൈകോ ഓൺലൈൻ വിപണനം ആരംഭിക്കും,’ മന്ത്രി വ്യക്തമാക്കി.
കോവിഡ് കാലമായതിനാൽ ജനങ്ങൾക്ക് സാധനങ്ങൾ വാങ്ങാനുള്ള സൗകര്യപ്രദമായ ഇടങ്ങൾ പരിഗണിച്ചാകും വിൽപനക്കുള്ള സ്ഥലങ്ങൾ കണ്ടെത്തുക. നിയമസഭാ മണ്ഡലത്തിന്റെ അടിസ്ഥാനത്തിലുള്ള ഓണച്ചന്തകൾക്ക് പുറമെ ആവശ്യമെങ്കിൽ കൂടുതൽ സ്ഥലങ്ങളിലേക്കും ഓണച്ചന്തകൾ വ്യാപിപ്പിക്കുന്നതിനെ കുറിച്ച് ആലോചിക്കുന്നുണ്ടെന്നും അദ്ദേഹം പറഞ്ഞു.
കൂടാതെ റേഷൻ കാർഡ് സംബന്ധിച്ച പോരായ്മകൾ പരിഹരിക്കുമെന്നും മന്ത്രി ജിആർ അനിൽ അറിയിച്ചു.
Most Read: പ്രജ്ഞ സിങ് താക്കൂറിന് വീട്ടിലെത്തി വാക്സിൻ നൽകി; പ്രതിഷേധവുമായി കോൺഗ്രസ്