കാസര്‍ഗോഡ്‌: കാഞ്ഞങ്ങാട് ജില്ലാ ആശുപത്രി ഒക്ടോബര്‍ ഒന്നുമുതല്‍ കോവിഡ് ആശുപത്രിയായി മാറും. ജില്ലയില്‍ കോവിഡ് രോഗികളുടെ എണ്ണവും മരണവും പ്രതിദിനം വര്‍ധിക്കുന്ന സാഹചര്യത്തിലാണ് ജില്ലാ ആശുപത്രി കോവിഡ് രോഗികള്‍ക്ക് മാത്രമുള്ള ചികിത്സ കേന്ദ്രമായി മാറുന്നത്. അതേസമയം ജില്ലാ ആശുപത്രിയില്‍ ലഭിക്കുന്ന സേവനങ്ങള്‍ മറ്റ് ആശുപത്രികളിലേക്ക് മാറ്റി.
അത്യാസന്ന നിലയിലുള്ള കോവിഡ് രോഗികള്‍ക്കായി ജില്ല ആശുപത്രിയില്‍ 100 ബെഡുള്ള വാര്‍ഡ് സജ്ജീകരിക്കും. കൂടാതെ അഞ്ച് വെന്റിലേറ്ററുകളും ഇവിടെ ഒരുക്കും. വാര്‍ഡില്‍ സെന്‍ട്രലൈസ്ഡ് ഒക്‌സിജന്‍ സപ്ലൈ ഉണ്ടാകും. കോവിഡ് ബാധിച്ച ഗര്‍ഭിണികളുടെ പ്രസവം ഉള്‍പ്പെടെയുള്ള ചികിത്സയും ആശുപത്രിയില്‍ നല്‍കും.
കണ്ണൂര്‍ ജില്ലയിലെ രോഗികളുടെ ആധിക്യം മൂലം പരിയാരം മെഡിക്കല്‍ കോളേജില്‍ ജില്ലയില്‍ നിന്നുള്ള രോഗികളെ പ്രവേശിപ്പിക്കാന്‍ കഴിയാത്ത സാഹചര്യമാണ്. ഇതുമൂലം രോഗികള്‍ വളരെയേറെ പ്രയാസം അനുഭവിക്കുകയും ചെയ്യുന്നു. ഈ സാഹചര്യത്തില്‍ ജില്ലയില്‍ തന്നെ കാറ്റഗറി സി കോവിഡ് രോഗികളെ ചികിത്സിക്കാന്‍ സൗകര്യം ഒരുക്കുന്നതിന്റെ ഭാഗമായാണ് ജില്ലാ ആശുപത്രിയെ കോവിഡ് ആശുപത്രിയാക്കി മാറ്റുന്നത്.
നിലവില്‍ ഗുരുതരാവസ്ഥയില്‍ ഉള്ള കോവിഡ് രോഗികളെ ചികിത്സിക്കുന്നത് ഉക്കിനടുക്ക മെഡിക്കല്‍ കോളജിലും മറ്റുള്ളവരെ ചികിത്സിക്കുന്നത് വീട്ടിലും, ജില്ലയിലെ ഒന്‍പത്‌ കോവിഡ് ഫസ്റ്റ് ലൈന്‍ ട്രീറ്റ്‌മെന്റ് സെന്ററുകളിലുമാണ്. എന്നാല്‍ ഉക്കിനടുക്ക മെഡിക്കല്‍ കോളജിലെ നിലവിലെ ഭൗതിക സാഹചര്യവും ജീവനക്കാരുടെ എണ്ണവും അനുസരിച്ച് കൂടുതല്‍ രോഗികളെ പ്രവേശിപ്പിക്കാന്‍ കഴിയാത്ത സാഹചര്യമാണുള്ളത്.
Read Also: ലുഫ്‌താന്‍സ അഖിലേന്ത്യാ വിമാന സര്‍വീസുകള്‍ റദ്ദാക്കി
അതേസമയം ജില്ലാ ആശുപത്രിയെ കോവിഡ് ആശുപത്രിയാക്കി മാറ്റുമെങ്കിലും ആശുപത്രിയില്‍ നിന്നും ലഭിക്കുന്ന സേവനങ്ങള്‍ മുടങ്ങില്ലെന്നും അധികൃതര്‍ അറിയിച്ചു. കാഞ്ഞങ്ങാട് ജില്ല ആശുപത്രിയിലെ സ്പെഷ്യല്‍റ്റി സേവനങ്ങള്‍ ആറു കിലോമീറ്റര്‍ ചുറ്റളവിലുള്ള മറ്റു സര്‍ക്കാര്‍ ആശുപത്രികളിലേക്ക് മാറ്റിസ്ഥാപിക്കും. സ്ത്രീരോഗ വിഭാഗം കാഞ്ഞങ്ങാട് ലക്ഷ്മി മേഘന്‍ ആശുപത്രിയിലേക്ക് 24 മണിക്കൂര്‍ സേവനം ലഭിക്കുന്ന തരത്തില്‍ മാറ്റും.
മറ്റ് സ്പെഷ്യല്‍റ്റി സേവനങ്ങള്‍ക്ക്;
- ജനറല്‍ ഒ.പി, ഐ.പി സേവനങ്ങള്‍: നീലേശ്വരം താലൂക്ക് ഹെഡ്ക്വാര്‍ട്ടേഴ്സ് ആശുപത്രി, പെരിയ സി.എച്ച്.സി, കാസര്‍കോട് ജനറല്‍ ആശുപത്രി, വെള്ളരിക്കുണ്ട് താലൂക്ക് ആശുപത്രി
- കാന്‍സര്‍ വിഭാഗം, ശിശുരോഗ വിഭാഗം, സര്‍ജറി ഒ.പി: നീലേശ്വരം താലൂക്ക് ഹെഡ്ക്വാര്‍ട്ടേഴ്സ് ആശുപത്രി
- നേത്രരോഗ വിഭാഗം: പെരിയ സി.എച്ച്.സി
- ത്വക്ക് രോഗ വിഭാഗം, ഇ.എന്‍.ടി ഒ.പി, ഡി.ഇ.ഐ.സി ഒ.പി: ആനന്ദാശ്രമം പി.എച്ച്.സി
- അസ്ഥിരോഗ വിഭാഗം: പെരിയ സി.എച്ച്.സി, നീലേശ്വരം താലൂക്ക് ഹെഡ്ക്വാര്‍ട്ടേഴ്സ് ആശുപത്രി
- പി.എം.ആര്‍ ഒ.പി: പെരിയ സി.എച്ച്.സിഅത്യാഹിത വിഭാഗം: കാസര്‍കോട് ജനറല്‍ ആശുപത്രി, നീലേശ്വരം താലൂക്ക് ഹെഡ്ക്വാര്‍ട്ടേഴ്സ് ആശുപത്രി, വെള്ളരിക്കുണ്ട് താലൂക്ക് ആശുപത്രി
- ദന്തരോഗ വിഭാഗം ഒ.പി: നീലേശ്വരം താലൂക്ക് ഹെഡ്ക്വാര്‍ട്ടേഴ്സ് ആശുപത്രി, പെരിയ സി.എച്ച്.സി
- ഇമ്യൂണൈസേഷന്‍ സേവനങ്ങള്‍: കാഞ്ഞങ്ങാട് ജില്ല ആശുപത്രി ഒഴികെ എല്ലാ സര്‍ക്കാര്‍ ആശുപത്രികളിലും ലഭ്യമാണ്.
- ഡയാലിസിസ്: കാസര്‍കോട് ജനറല്‍ ആശുപത്രി, കാഞ്ഞങ്ങാട് ജില്ല ആശുപത്രി, തൃക്കരിപ്പൂര്‍ താലൂക്ക് ആശുപത്രി
- പാമ്പ് വിഷം: കാസര്‍കോട് ജനറല്‍ ആശുപത്രി
- പാലിയേറ്റിവ് സേവനങ്ങള്‍: ചെമ്മട്ടംവയല്‍ വയോജന വിശ്രമ കേന്ദ്രം
Malabar News: ഇലക്‌ട്രിക്‌ വാഹനങ്ങൾ ചാർജ് ചെയ്യാനുള്ള സ്‌റ്റേഷൻ നല്ലളത്ത് തയ്യാറായി
