ന്യൂ ഡെല്‍ഹി: ഇന്ത്യയും ജര്‍മ്മനിയും ഒപ്പുവെച്ച എയര്‍ ബബിള്‍ കരാറിലെ അഭിപ്രായ വ്യത്യാസങ്ങളെ തുടര്‍ന്ന് ജര്‍മ്മന്‍ എയര്‍ലൈനായ ലുഫ്‌താന്‍സ അഖിലേന്ത്യാ വിമാന സര്‍വീസുകള്‍ റദ്ദാക്കി. വിമാന സര്‍വീസുകളുടെ എണ്ണത്തിന്‍മേലുള്ള തര്‍ക്കത്തെ തുടര്‍ന്നാണ് സെപ്റ്റംബര്‍ 30 മുതല്‍ ഒക്ടോബര്‍ 20 വരെയുള്ള മുഴുവന്‍ സര്‍വീസുകളും ലുഫ്‌താന്‍സ റദ്ദാക്കിയത്.
നേരത്തെ ആസൂത്രണം ചെയ്‌ത ഫ്‌ളൈറ്റ് ഷെഡ്യൂളുകള്‍ ഇന്ത്യന്‍ അധികൃതര്‍ അപ്രതീക്ഷിതമായി നിരസിച്ചതാണ് സര്‍വീസുകള്‍ റദ്ദാക്കാന്‍ കാരണമായതെന്ന് ജര്‍മ്മന്‍ എയര്‍ലൈന്‍ പ്രസ്‌താവനയില്‍ അറിയിച്ചു. ഇരു രാജ്യങ്ങളും തമ്മിലുള്ള താല്‍ക്കാലിക യാത്രാ കരാറിന്റെ വിശദാംശങ്ങള്‍ ചര്‍ച്ച ചെയ്യാനുള്ള ജര്‍മ്മന്‍ സര്‍ക്കാരിന്റെ ക്ഷണം ഇന്ത്യ ഇതുവരെ അംഗീകരിച്ചിട്ടില്ലെന്നും റിപ്പോര്‍ട്ടില്‍ പറയുന്നു.
അതേസമയം ഇന്ത്യയില്‍ ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷനും (ഡിജിസിഎ) വിശദീകരണവുമായി രംഗത്തെത്തി. ജൂലൈയില്‍ ജര്‍മ്മനിയുമായി എയര്‍ ബബിള്‍ കരാര്‍ ഉണ്ടാക്കിയെങ്കിലും ജര്‍മ്മനിയിലേക്ക് പോകാന്‍ ഇന്ത്യക്കാര്‍ക്ക് നിയന്ത്രണങ്ങള്‍ ഏര്‍പ്പെടുത്തിയത് ഇന്ത്യന്‍ വിമാനക്കമ്പനികളെ പ്രതികൂലമായി ബാധിച്ചതായി ഡിജിസിഎ പ്രസ്‌താവനയില്‍ അറിയിച്ചു. എന്നാല്‍ ഇത് ലുഫ്‌താന്‍സയുടെ സര്‍വീസുകള്‍ക്ക് അനുകൂലമാതായും പ്രസ്‌താവനയില്‍ പറഞ്ഞു.
ആഴ്‌ചയില്‍ ഇന്ത്യന്‍ വിമാനക്കമ്പനികള്‍ 3-4 സര്‍വീസുകള്‍ മാത്രം നടത്തിയപ്പോള്‍ ലുഫ്‌താന്‍സ 20ഓളം വിമാന സര്‍വീസുകളാണ് നടത്തിയത്. ഈ സാഹചര്യത്തില്‍ ലുഫ്‌താന്‍സക്കായി ആഴ്‌ചയില്‍ ഏഴ് വിമാനങ്ങള്‍ ക്ലിയര്‍ ചെയ്യാമെന്ന് വാഗ്ദാനം ചെയ്‌തതായും എന്നാല്‍ ജര്‍മ്മന്‍ എയര്‍ലൈന്‍ ഇത് അംഗീകരിച്ചില്ലെന്നും സിവില്‍ ഏവിയേഷന്‍ പറഞ്ഞു. അതേസമയം വിഷയത്തില്‍ ചര്‍ച്ചകള്‍ തുടരുകയാണെന്നും ഡിജിസിഎ കൂട്ടിച്ചേര്‍ത്തു.
സെപ്റ്റംബര്‍ അവസാനം വരെ പ്രത്യേക വിമാന സര്‍വീസുകള്‍ തുടരാന്‍ അനുമതി നല്‍കണമെന്ന് ആവശ്യപ്പെട്ട് ജര്‍മ്മനി അപേക്ഷ നല്‍കിയതായും റിപ്പോര്‍ട്ടില്‍ വ്യക്തമാക്കി.
Read Also: തമിഴ്‌നാട്ടില്‍ നിന്ന് കേരളത്തിലേക്ക് മൂന്ന് തീവണ്ടികള്‍ കൂടി
