ബെംഗളൂരു: മുഖ്യമന്ത്രി പദവുമായി ബന്ധപ്പെട്ട അഭ്യൂഹങ്ങൾ പാടെ തള്ളി സിദ്ധരാമയ്യ. രണ്ടരവർഷം കഴിയുമ്പോൾ മുഖ്യമന്ത്രി പദം ഡികെ ശിവകുമാറിന് കൈമാറുമെന്ന അഭ്യൂഹങ്ങൾക്കിടെയാണ് സിദ്ധരാമയ്യ നിലപാട് വ്യക്തമാക്കിയത്. അത്തരമൊരു കരാർ ഉണ്ടാക്കിയിട്ടില്ലെന്നും ഹൈക്കമാൻഡ് തീരുമാനം വരുംവരെ മുഖ്യമന്ത്രിയായി തുടരുമെന്നും സിദ്ധരാമയ്യ വ്യക്തമാക്കി.
അധികാരം പങ്കിടുന്നതിനെ കുറിച്ച് ബിജെപി എംഎൽഎയുടെ ചോദ്യത്തിന് കർണാടക നിയമസഭയിലാണ് സിദ്ധരാമയ്യ മറുപടി നൽകിയത്. നിയമസഭാ സമ്മേളനത്തിന്റെ അവസാന ദിവസമാണ് പ്രതിപക്ഷം സിദ്ധരാമയ്യയോട് അധികാരം പങ്കിടുന്നതിനെ കുറിച്ചുള്ള ചോദ്യങ്ങൾ ആവർത്തിച്ച് ഉന്നയിച്ചത്.
നിയമസഭാ പാർട്ടി അഞ്ചുവർഷത്തേക്കാണ് താങ്കളെ തിരഞ്ഞെടുത്തതെന്നും ഇപ്പോൾ രണ്ടര വർഷത്തെക്കുറിച്ച് എന്താണ് പറയാനുള്ളതെന്നുമാണ് ബിജെപി എംഎൽഎയും പ്രതിപക്ഷ നേതാവുമായ ആർ. അശോകൻ ചോദിച്ചത്. രണ്ടര വർഷത്തെക്കുറിച്ച് ഒന്നും പറഞ്ഞിട്ടില്ലെന്നും അത്തരമൊരു കരാറില്ലെന്നും സിദ്ധരാമയ്യ പ്രതികരിച്ചു. മുഴുവൻ കാലാവധിയും പൂർത്തിയാക്കുമെന്നും 2028ൽ അധികാരത്തിൽ തിരിച്ചെത്തുമെന്നും സിദ്ധരാമയ്യ ദിവസങ്ങൾക്ക് മുൻപ് പറഞ്ഞിരുന്നു.
Most Read| തടാകത്തിന് മുകളിൽ ഒഴുകിനടന്ന് പാൻകേക്കുകൾ! അപൂർവ പ്രതിഭാസം
