കോഴിക്കോട്: വനിതാ ആക്‌ടീവിസ്‌റ്റായ ബിന്ദു അമ്മിണിക്ക് നേരെ ജില്ലയിൽ ആക്രമണം. സംഭവത്തിന്റെ ദൃശ്യങ്ങൾ ബിന്ദു തന്നെ സോഷ്യൽ മീഡിയയിൽ പങ്കുവച്ചിട്ടുണ്ട്. കോഴിക്കോട് നോർത്ത് ബീച്ചിൽ വച്ച് പ്രകോപനമൊന്നുമില്ലാതെ ഒരാൾ തന്നെ ആക്രമിക്കുകയായിരുന്നു എന്നാണ് ബിന്ദു അമ്മിണി വ്യക്‌തമാക്കുന്നത്‌.
സോഷ്യൽ മീഡിയയിൽ പങ്കുവച്ചതിൽ ഒരു വീഡിയോയിൽ സ്‌കൂട്ടറിൽ വന്ന ഒരാളുടെ ദൃശ്യങ്ങളാണ് പങ്കുവച്ചിരിക്കുന്നത്. രണ്ടാമത്തെ വീഡിയോയിലാണ് ഇയാൾ ബിന്ദുവിനെ ആക്രമിക്കുന്നതും, അവർ തിരിച്ചു പ്രതിരോധിക്കുന്നതും ഉള്ളത്. തന്റെ കൂടെ ഉണ്ടായിരുന്നവരുടെ വാഹനങ്ങൾ തടഞ്ഞുവെക്കുകയും, അവരെ ഓടിക്കുകയും ചെയ്‌ത ശേഷം, താൻ ഒറ്റക്ക് ആയപ്പോഴാണ് ആക്രമണം നടത്തിയതെന്ന് ബിന്ദു അമ്മിണി വ്യക്‌തമാക്കി. അക്രമി മദ്യലഹരിയിൽ ആയിരുന്നെന്നും അവർ പറഞ്ഞു.
ആക്രമണത്തിന് പിന്നാലെ വെള്ളയിൽ പോലീസ് കേസെടുത്തിട്ടുണ്ട്. അടിപിടി, സ്‌ത്രീകളെ അപമാനിക്കൽ എന്നീ വകുപ്പുകൾ ചുമത്തിയാണ് അക്രമിക്കെതിരെ പോലീസ് കേസെടുത്തത്. വാഹനങ്ങൾ നിർത്തുന്നതുമായി ബന്ധപ്പെട്ട തർക്കമാണ് കയ്യാങ്കളിയിൽ എത്തിയതെന്നാണ് പോലീസ് വ്യക്‌തമാക്കുന്നത്‌.
Read also: സംസ്‌ഥാനത്ത് 49 പേർക്ക് കൂടി ഒമൈക്രോൺ; ആകെ രോഗബാധിതർ 230
