ചെന്നൈ : വിദേശത്ത് നിന്നും ഇറക്കുമതി ചെയ്ത ആഡംബര കാറിന്റെ പ്രവേശന നികുതിയിൽ ഇളവ് അനുവദിക്കണമെന്ന ആവശ്യം തള്ളിയ സിംഗിൾ ബെഞ്ച് വിധിക്കെതിരെ മദ്രാസ് ഹൈക്കോടതിയിൽ അപ്പീൽ നൽകി നടൻ വിജയ്. കൂടാതെ നടനെതിരായ സിംഗിൾ ബെഞ്ചിന്റെ പ്രസ്താവനകൾ നീക്കണമെന്നും അപ്പീലിൽ ആവശ്യപ്പെട്ടിട്ടുണ്ടെന്നാണ് സൂചന.
ഹരജി ജസ്റ്റിസ് എംഎം സുന്ദരേഷ്, ജസ്റ്റിസ് ആർഎൻ മഞ്ജുള എന്നിവരടങ്ങിയ ബെഞ്ച് തിങ്കളാഴ്ച പരിഗണിച്ചേക്കും. 2012ൽ ഇംഗ്ളണ്ടിൽ നിന്നും ഇറക്കുമതി ചെയ്ത റോൾഡ് റോയ്സ് ഗോസ്റ്റ് കാറിന്റെ പ്രവേശന നികുതിയിൽ ഇളവ് അനുവദിക്കണമെന്ന ആവശ്യവുമായാണ് നടൻ വിജയ് കോടതിയെ സമീപിച്ചത്. എന്നാൽ ഹരജി പരിഗണിച്ച സിംഗിൾ ബെഞ്ച് രൂക്ഷമായ രീതിയിൽ വിമർശനം ഉന്നയിക്കുകയും, ഒരു ലക്ഷം രൂപ പിഴ ചുമത്തുകയും ചെയ്തിരുന്നു.
സിനിമയിലെ സൂപ്പർ താരങ്ങൾ യഥാർഥ ജീവിതത്തിൽ റീൽ ഹീറോ ആകരുതെന്നും, നികുതി കൃത്യമായി അടച്ച് മാതൃകയാകുകയാണ് വേണ്ടതെന്നും കോടതി വ്യക്തമാക്കിയിരുന്നു. ഈ പ്രസ്താവന പിൻവലിക്കണമെന്ന ആവശ്യമാണ് ഹൈക്കോടതിയിൽ സമർപ്പിച്ച ഹരജിയിൽ ഉന്നയിച്ചിട്ടുള്ളത്. ഇംഗ്ളണ്ടിൽ നിന്നും ഇറക്കുമതി ചെയ്ത ആഡംബര കാറിന്റെ ഇറക്കുമതി തീരുവ നേരത്തെ തന്നെ അടച്ചെങ്കിലും, പ്രവേശന നികുതി വിജയ് ഇതുവരെ അടച്ചിരുന്നില്ല.
Read also : മംഗലം ഡാമിന്റെ ആറ് ഷട്ടറുകളും തുറന്നു; ജാഗ്രതാ നിർദ്ദേശം