പാലക്കാട്: അട്ടപ്പാടിയിൽ വീണ്ടും ശിശുമരണം. പുതൂര്‍ നടുമുള്ളി ഊരിലെ ഈശ്വരി- കുമാര്‍ ദമ്പതികളുടെ മൂന്ന് ദിവസം പ്രായമുള്ള ആണ്‍കുഞ്ഞാണ് മരിച്ചത്. ഇന്ന് പുലർച്ചെ നാല് മണിയോടെയാണ് മരണം സ്‌ഥിരീകരിച്ചത്‌.
കോട്ടത്തറ ട്രൈബൽ ആശുപത്രിയിൽ ചികിൽസയിൽ കഴിയുമ്പോഴാണ് കുഞ്ഞ് മരിച്ചത്. കഴിഞ്ഞ മൂന്നാം തീയതിയാണ് ഈശ്വരിയെ ആശുപത്രിയിൽ പ്രവേശിപ്പിച്ചത്. ഈശ്വരിക്ക് ബ്ളഡ് പ്രഷര്‍ കുറഞ്ഞതടക്കമുള്ള ആരോഗ്യ പ്രശ്‌നങ്ങൾ ഉണ്ടായിരുന്നു. തുടർന്ന് കഴിഞ്ഞ 7ആം തീയതി സിസേറിയനിലൂടെ കുഞ്ഞിനെ പുറത്തെടുക്കുകയായിരുന്നു.
2 കിലോ മാത്രമായിരുന്നു ജനിക്കുമ്പോൾ കുഞ്ഞിന്റെ ഭാരം. ഈ സംഭവത്തോടെ അട്ടപ്പാടിയിൽ ഈ വർഷത്തെ ആദ്യത്തെ ശിശുമരണം റിപ്പോർട് ചെയ്‌തിരിക്കുകയാണ്. കഴിഞ്ഞ വര്‍ഷം ഔദ്യോഗിക കണക്കുകള്‍ പ്രകാരം 9 ശിശുമരണങ്ങളും അനൗദ്യോഗിക കണക്കുകള്‍ പ്രകാരം 12 മരണങ്ങളും സ്‌ഥിരീകരിച്ചിരുന്നു.
Read also: ഗോവ തിരഞ്ഞെടുപ്പ്; സ്വതന്ത്ര എംഎൽഎ കോൺഗ്രസിലേക്ക്
