ലണ്ടൻ: ബ്രിട്ടണിലെ ആരോഗ്യ പ്രവർത്തകർക്ക് ഒരാഴ്‌ചക്കകം കോവിഡ് പ്രതിരോധ വാക്‌സിൻ ലഭിച്ചേക്കുമെന്ന് റിപ്പോർട്ടുകൾ. കോവിഡ് പ്രതിരോധ വാക്‌സിനായ ഫൈസറിന് അടുത്ത ആഴ്‌ചയോടെ രാജ്യം അനുമതി നൽകുമെന്നാണ് കരുതുന്നത്. തുടർന്ന് ആരോഗ്യ പ്രവർത്തകർക്ക് വാക്‌സിൻ ലഭ്യമാക്കാനാണ് ബ്രിട്ടീഷ് സർക്കാർ ശ്രമിക്കുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്.
ക്ളിനിക്കൽ പരീക്ഷണത്തിൽ 95 ശതമാനം കാര്യക്ഷമമെന്ന് വിലയിരുത്തപ്പെട്ട ഫൈസർ കോവിഡ് വാക്‌സിനെ ഏറെ പ്രതീക്ഷയോടെയാണ് ലോകം നോക്കിക്കാണുന്നത്. ഫൈസറിന്റെ 40 ദശലക്ഷം ഡോസുകൾക്ക് യുകെ ഇതിനോടകം ഓർഡർ നൽകിക്കഴിഞ്ഞു. നിശ്‌ചയിച്ചതു പ്രകാരം കാര്യങ്ങൾ പുരോഗമിക്കുകയാണെങ്കിൽ വാക്‌സിന്റെ ആദ്യഘട്ട വിതരണം ഡിസംബർ 7ഓടെ രാജ്യത്ത് തുടങ്ങും.
രാജ്യത്തെ കോവിഡ് വാക്‌സിൻ വിതരണത്തിന് മേൽനോട്ടം വഹിക്കുന്നതിനായി ബ്രിട്ടീഷ് ബിസിനസ് മന്ത്രി നഥിം സാഹവിയെയാണ് പ്രധാനമന്ത്രി ബോറിസ് ജോൺസൺ ചുമതലപ്പെടുത്തിയിരിക്കുന്നത്.
