മലപ്പുറം: കക്കുളത്തെ ഒമാനൂർ നേർച്ചപ്പെട്ടി തകർത്ത് പണം കവർന്നു. കക്കുളം വേങ്ങശ്ശേരി ക്ഷേത്രത്തിലെ ഭണ്ഡാരവും തകർക്കാൻ ശ്രമിച്ച നിലയിലാണ്. മോഷണം നടത്തുന്നതിന്റെ സിസിടിവി ദൃശ്യം പാണ്ടിക്കാട് പോലീസിന് ലഭിച്ചു.
കക്കുളത്ത് റോഡരികിൽ സ്ഥാപിച്ച ഒമാനൂർ ശുഹാദാക്കളുടെ നേർച്ചപ്പെട്ടിയുടെ പൂട്ട് തകർത്താണ് മോഷണം നടത്തിയത്. പ്രദേശവാസികൾ രാവിലെ നേർച്ചപ്പെട്ടിയിലെ നാണയ തുട്ടുകൾ നിലത്ത് വീണ നിലയിൽ കണ്ടതിനെ തുടർന്ന് പരിശോധിച്ചപ്പോഴാണ് മോഷണം നടന്നതായി അറിയുന്നത്. തുടർന്ന് പോലീസിനെ വിവരം അറിയിക്കുകയായിരുന്നു.
സമീപത്തെ കടയിലെ സിസിടിവി യിൽ നിന്ന് മോഷണം നടന്നുന്നതിന്റെ ദൃശ്യങ്ങൾ പോലീസ് ശേഖരിച്ചിട്ടുണ്ട്. യമഹ എഫ്ഇസെഡ് ബൈക്കിലെത്തിയ യുവാക്കളാണ് മോഷണം നടത്തിയതെന്ന് ദൃശ്യങ്ങളിൽ വ്യക്തമാണ്. നേർച്ചപ്പെട്ടി കമ്പിപ്പാര ഉപയോഗിച്ച് തകർക്കുന്നതും ദൃശ്യങ്ങളിലുണ്ട്.
അതേസമയം കക്കുളം വേങ്ങശ്ശേരി ക്ഷേത്രത്തിലെ ഭണ്ഡാരവും തകർക്കാൻ ശ്രമിച്ചിട്ടുണ്ട്. മഹാവിഷ്ണുവിന്റെ ശ്രീകോവിലിന് മുന്നിലെ ഭണ്ഡാരമാണ് തകർക്കാൻ ശ്രമിച്ചത്. എന്നാൽ ഒന്നും മോഷണം പോയിട്ടില്ല. ക്ഷേത്രം ഭാരവാഹികളുടെ പരാതിയുടെ അടിസ്ഥാനത്തിൽ പാണ്ടിക്കാട് പോലീസ് സ്ഥലത്തെത്തി അന്വേഷണം ആരംഭിച്ചു.
Malabar News: തൃക്കരിപ്പൂർ പോളിയിൽ എഫ്എൽടിസി ഒരുങ്ങുന്നു