തിരുവനന്തപുരം: കഞ്ചാവ് ചെടികൾ വീട്ടുവളപ്പിൽ നട്ട് വളർത്തിയതിന് യുവാവ് പോലീസിന്റെ പിടിയിലായി. തിരുവനന്തപുരം വിതുരയിലാണ് സംഭവം. തൊളിക്കോട് തുരുത്തി പാലക്കോണം മഞ്ജുഷാ ഭവനിൽ മനോജാണ് (32) പിടിയിലായത്.
പുറത്തുള്ള ആരും അറിയാതെ സ്വന്തം വീട്ടുവളപ്പിലാണ് ഇയാൾ കഞ്ചാവ് ചെടികൾ നട്ടത്. എല്ലാ ദിവസവും കഞ്ചാവ് ഉപയോഗിക്കാറുള്ള ആളായിരുന്നു മനോജ്. കഞ്ചാവ് വലിച്ച ശേഷം മിക്ക ദിവസങ്ങളിലും ഇയാൾ ഭാര്യയെ ക്രൂരമായി മർദ്ദിക്കാറുമുണ്ട്. സഹികെട്ട മനോജിന്റെ ഭാര്യ ഒടുവിൽ വിതുര സ്റ്റേഷനിൽ പരാതി നൽകുകയായിരുന്നു.
പരാതിയുടെ അടിസ്ഥാനത്തിൽ അന്വേഷണത്തിനായി ഇവരുടെ വീട്ടിലെത്തിയ പോലീസ് സംഘമാണ് വീട്ടുവളപ്പിൽ തന്നെ കഞ്ചാവ് ചെടികൾ നട്ടുവളർത്തിയിരിക്കുന്നത് ശ്രദ്ധിച്ചത്. പോലീസിനെ കണ്ട മനോജ് ഉടൻ തന്നെ അവിടെ നിന്നും രക്ഷപ്പെടുകയായിരുന്നു.
പിന്നീട് വിതുര സിഐ എസ് ശ്രീജിത്ത്, എസ്ഐ എസ്എൽ സുധീഷ് എന്നിവർ ചേർന്നാണ് പ്രതിയെ പിടികൂടിയത്. നെടുമങ്ങാട് കോടതിയിൽ ഹാജരാക്കിയ മനോജിനെ റിമാൻഡ് ചെയ്തു.
Most Read: 12- 14 വയസുവരെയുള്ള കുട്ടികളുടെ വാക്സിനേഷന് ഇന്ന് മുതൽ