മുത്തങ്ങ: മതിയായ രേഖകളില്ലാതെ കണ്ടെയ്‌നർ ലോറിയിൽ ഒളിപ്പിച്ചു കടത്തിയ 10,63,200 രൂപ മുത്തങ്ങ എക്സൈസ് ചെക്‌പോസ്‌റ്റിലെ വാഹന പരിശോധനയിൽ പിടികൂടി. സംഭവവുമായി ബന്ധപ്പെട്ട് രണ്ടുപേരെ കസ്‌റ്റഡിയിലെടുത്തു. തിരൂരങ്ങാടി സ്വദേശികളായ കോണത്തുംകുഴി വീട്ടിൽ കെ നിസാർ (36), കല്ലുവളപ്പിൽ വീട്ടിൽ എംപി അബ്‌ദുൾ നാസർ (36) എന്നിവരാണ് പിടിയിലായത്.
ബെംഗളൂരുവിൽനിന്ന് കോഴിക്കോട് ഭാഗത്തേക്ക് വരികയായിരുന്ന കണ്ടെയ്‌നർ ലോറിയുടെ ടൂൾ ബോക്‌സിലെ ബാഗിനുള്ളിൽ നിന്നാണ് പണം കണ്ടെത്തിയത്. തിങ്കളാഴ്‌ചയാണ് കണ്ടെയ്‌നർ ലോറി പരിശോധിച്ചത്. കോഴിക്കോട്ടുനിന്ന് കൊണ്ടുപോയ മീൻ ബെംഗളൂരുവിൽ ഇറക്കിയശേഷം തിരിച്ചുവരികയായിരുന്നു ഇവർ.
പിടിച്ചെടുത്ത പണവും വാഹനവും പ്രതികളെയും ബത്തേരി പോലീസിന് കൈമാറി. മുത്തങ്ങ എക്സൈസ് ഇൻസ്‌പെക്‌ടർ പി ബാബുരാജ്, പ്രിവന്റീവ് ഓഫിസർമാരായ പിപി ശിവൻ, ടിബി അജീഷ്, സിവിൽ എക്സൈസ് ഓഫീസർമാരായ എഎം ബിനുമോൻ, അഭിലാഷ് ഗോപി എന്നിവരടങ്ങിയ സംഘമാണ് പണം പിടികൂടിയത്.
Read Also: മാനാഞ്ചിറ മൈതാനം തുറന്ന് കൊടുത്തു
