ന്യൂഡെൽഹി: ഉത്തരേന്ത്യയിൽ ഉഷ്‌ണതരംഗത്തിന് താൽകാലിക ശമനമെന്ന് കാലാവസ്‌ഥാ നിരീക്ഷണ കേന്ദ്രം. ഡെൽഹിയിൽ അടുത്ത 3 ദിവസം നേരിയ തോതിൽ മഴക്ക് സാധ്യതയുണ്ടെന്നാണ് കാലാവസ്‌ഥാ കേന്ദ്രം വ്യക്‌തമാക്കുന്നത്‌. അടുത്ത ദിവസങ്ങളിൽ ഡെൽഹി, പഞ്ചാബ്, ഹരിയാന, ഉത്തർപ്രദേശ്, എന്നീ സംസ്‌ഥാനങ്ങളിൽ ഉഷ്‌ണതരംഗം ശമിച്ചുതുടങ്ങുമെന്നും അധികൃതർ അറിയിച്ചു.
ഏപ്രിലിൽ രാജ്യത്തെ മിക്ക സംസ്‌ഥാനങ്ങളിലും ഏറ്റവും ഉയർന്ന താപനിലയാണ് രേഖപ്പെടുത്തിയത്. കഴിഞ്ഞ 27 കൊല്ലത്തിനിടയിലുള്ള ഏറ്റവും ഉയർന്ന ചൂടാണ് ന്യൂഡെൽഹിയിൽ രേഖപ്പെടുത്തിയത്. അതേസമയം ഇനി ഒരാഴ്‌ച ചൂട് അധികം ഉയരില്ലെന്നാണ് കാലാവസ്‌ഥാ നിരീക്ഷണ കേന്ദ്രം വ്യക്‌തമാക്കുന്നത്‌.
ദേശീയ ആരോഗ്യ സെക്രട്ടറി രാജേഷ് ഭൂഷൺ ഞായറാഴ്‌ച സംസ്‌ഥാനങ്ങൾക്ക് അയച്ച കത്തിൽ ചൂടു സംബന്ധമായ അസുഖങ്ങളിൽ വിശദമായ ആക്ഷൻ പ്ളാൻ നടപ്പാക്കണമെന്ന് നിർദ്ദേശം നൽകിയിട്ടുണ്ട്. കൂടാതെ പകൽ സമയത്ത് ആളുകൾ തുറസായ സ്‌ഥലത്ത് നിൽക്കുന്നതും ജോലി ചെയ്യുന്നതും ഒഴിവാക്കണമെന്നും, മുൻകരുതലുകൾ സ്വീകരിക്കണമെന്നും സംസ്‌ഥാന സർക്കാരുകൾ പൊതുജനങ്ങൾക്ക് നിർദ്ദേശം നൽകി.
Read also: കേന്ദ്രമന്ത്രി സ്‌മൃതി ഇറാനി നാളെ കേരളത്തിൽ; വയനാട് സന്ദർശിക്കും
