കണ്ണൂർ: ജില്ലയിലെ മൂന്ന് തദ്ദേശ സ്‌ഥാപനങ്ങളിൽ സമ്പൂർണ വാക്‌സിനേഷൻ. പയ്യന്നൂർ, ആന്തൂർ നഗരസഭകളും ഏരുവേശി പഞ്ചായത്തുമാണ് അർഹരായ മുഴുവൻ പേർക്കും ആദ്യ ഡോസ് വാക്‌സിൻ നൽകി നേട്ടം കൈവരിച്ചത്. കൂടാതെ, തളിപ്പറമ്പ്, കൂത്തുപറമ്പ് നഗരസഭകളിൽ 96 ശതമാനത്തിന് മുകളിലും വളപട്ടണം, ഇരിക്കൂർ, കോട്ടയം മലബാർ പഞ്ചായത്തുകളിൽ 95 ശതമാനത്തിന് മുകളിലുമാണ് ആദ്യ ഡോസ് നേടിയവരുടെ എണ്ണം. ഇതോടെ ജില്ലയിൽ വാക്‌സിനേഷൻ പുരോഗമിക്കുകയാണ്.
ജില്ലയിൽ ആകെ 19,49,789 ഡോസ് വാക്‌സിനാണ് വിതരണം ചെയ്‌തത്‌. ഇതിൽ വാക്‌സിൻ എടുക്കാൻ അർഹതയുള്ളവരിൽ 14,60,132 പേർ ആദ്യ ഡോസും 5,25,639 പേർ രണ്ടാം ഡോസും സ്വീകരിച്ചിട്ടുണ്ട്. ഇവ യഥാക്രമം ആദ്യ ഡോസ് സ്വീകരിച്ചത് 67.33 ശതമാനം പേരും രണ്ടാം ഡോസ് സ്വീകരിച്ചത് 24.24 ശതമാനവുമാണ്. മുൻഗണനാ വിഭാഗത്തിൽപെട്ട 60 വയസിന് മുകളിലുള്ള 4,45,770 പേരിൽ 4,15,283 പേർക്ക് ആദ്യ ഡോസും 2,31,935 പേർക്ക് രണ്ടാം ഡോസും നൽകിയിട്ടുണ്ട്.
45 നും 60 നും ഇടയിൽ പ്രായമുള്ള 5,11,937 പേരിൽ 4,18,119 പേർക്ക് ആദ്യ ഡോസും 1,76,012 പേർക്ക് രണ്ടാം ഡോസും നൽകിയിട്ടുണ്ട്. 18 നും 44 നും ഇടയിൽ പ്രായമുള്ള 12,11,018 പേരിൽ 5,13,873 പേർ ആദ്യ ഡോസും 40,541 പേർ രണ്ടാം ഡോസും സ്വീകരിച്ചിട്ടുണ്ട്. കൂടാതെ, ജില്ലയിലെ ആരോഗ്യ പ്രവർത്തകർ, ആശാവർക്കർമാർ, മറ്റ് കോവിഡ് മുൻനിര പ്രവർത്തകർ എന്നിവരിൽ 100 ശതമാനം പേർക്കും ആദ്യ ഡോസ് നൽകിയതായി കളക്‌ടർ അറിയിച്ചു.
Read Also: മെഗാ വാക്‌സിനേഷൻ ക്യാമ്പ് നിർത്തിവെച്ച് പൊന്നാനി നഗരസ
