ന്യൂഡൽഹി: രാജ്യത്ത്‌ കോവിഡ് കേസുകൾ 20 ലക്ഷം കടന്നു. 62,538 പുതിയ കേസുകളാണ് റിപ്പോർട്ട് ചെയ്തിരിക്കുന്നത്. 13,78,106 പേര്‍ രോഗമുക്തി നേടി. 41,000 പേരാണ് ഇതുവരെ കോവിഡ് ബാധിച്ചു മരിച്ചത്. പ്രതിദിനം അരലക്ഷത്തിലേറെ പുതിയരോഗികളും എണ്ണൂറിലേറെ മരണവുമാണ്‌ റിപ്പോർട്ടുചെയ്യുന്നത്‌.
രോഗവ്യാപനം ഇതുപോലെ തുടർന്നാൽ ഓഗസ്റ്റ് പകുതിയോടെ രോഗ ബാധിതരുടെ എണ്ണം കാൽ കോടിയിലെത്തുമെന്നാണ് റിപ്പോർട്ട്.
നിലവിൽ ഏറ്റവും കൂടുതൽ പ്രതിദിന കോവിഡ് കേസുകൾ ഇന്ത്യയിലാണ്‌ റിപ്പോർട്ട് ചെയ്തത്. ബുധനാഴ്ച ലോകത്ത് ഏറ്റവും കൂടുതൽ കേസുകൾ റിപ്പോർട്ട് ചെയ്തത് ഇന്ത്യയിലായിരുന്നു. അതേസമയം യു.എസിൽ 55,148ഉം ബ്രസീലിൽ 54,685മാണ് ബുധനാഴ്ച റിപ്പോർട്ട് ചെയ്ത കേസുകളുടെ എണ്ണം. മഹാരാഷ്ട്രയിലാണ് ഇന്ത്യയിൽ ഏറ്റവും കൂടുതല്‍ കോവിഡ് ബാധിതരുള്ളത്. തമിഴ്‌നാടും ആന്ധ്രാപ്രദേശുമാണ് തൊട്ടുപിന്നില്‍.
