ആലപ്പുഴ : ആലപ്പുഴയില്‍ വനിതാ പോലീസ് ഓഫീസര്‍ക്ക് കോവിഡ് സ്ഥിരീകരിച്ചു. അരൂര്‍ സ്റ്റേഷനിലെ വനിതാ പോലീസ് ഓഫീസര്‍ക്കാണ് കഴിഞ്ഞ ദിവസം രോഗം സ്ഥിരീകരിച്ചത്. ഇതേ തുടര്‍ന്ന് അരൂര്‍ സ്റ്റേഷന്‍ താല്‍ക്കാലികമായി അടച്ചു. ഇവരുമായി സമ്പര്‍ക്കത്തില്‍ ഉണ്ടായിരുന്ന നാല് പോലീസുകാര്‍ ഇപ്പോള്‍ നിരീക്ഷണത്തിലാണ്. 40 ഓളം പോലീസുകാരോട് ക്വാറന്റൈനില്‍ പോകാന്‍ ആരോഗ്യവകുപ്പ് നിര്‍ദ്ദേശിച്ചിട്ടുണ്ട്. അരൂര്‍ സ്റ്റേഷനിലെ എല്ലാ പോലീസുകാര്‍ക്കും ഉടന്‍ തന്നെ സ്രവ പരിശോധന നടത്തുമെന്നും ആരോഗ്യവകുപ്പ് അറിയിച്ചു.
ഓഗസ്റ്റ് 12 നാണ് രോഗം സ്ഥിരീകരിച്ച ഉദ്യോഗസ്ഥ അവസാനമായി ജോലിക്കെത്തിയത്. ഇവരുടെ അയല്‍ക്കാര്‍ക്ക് നേരത്തെ കോവിഡ് സ്ഥിരീകരിച്ചിരുന്നു. ഇവരില്‍ നിന്നാകാം പോലീസ് ഉദ്യോഗസ്ഥയ്ക്കും രോഗബാധയുണ്ടായതെന്നാണ് ആരോഗ്യവകുപ്പിന്റെ നിഗമനം.
ഇതോടെ ആലപ്പുഴയില്‍ 1321 പേരാണ് കോവിഡ് സ്ഥിരീകരിച്ച് ചികിത്സയിലുള്ളത്. ഇന്ന് സംസ്ഥാനത്ത് എട്ട് പേര്‍ കോവിഡ് ബാധിച്ചു മരിച്ചു. ഇവരില്‍ ഒരാള്‍ ആലപ്പുഴ സ്വദേശിയാണ്.
