ന്യൂഡെൽഹി: കോവിഡ് രോഗവ്യാപന പശ്ചാത്തലത്തിൽ പ്രധാനമന്ത്രി നരേന്ദ്ര മോദി നാളെ മുഖ്യമന്ത്രിമാരുമായി വീഡിയോ കോൺഫറൻസ് നടത്തും. കോവിഡ് രോഗബാധ രൂക്ഷമായ ഡെൽഹി, മഹാരാഷ്ട്ര, കർണാടക, രാജസ്ഥാൻ, പശ്ചിമ ബംഗാൾ തുടങ്ങിയ സംസ്ഥാനങ്ങളിലെ കോവിഡ് സാഹചര്യങ്ങൾ പ്രധാനമന്ത്രി വിലയിരുത്തും.
രാജ്യത്തെ കോവിഡ് വാക്സിൻ പരീക്ഷണങ്ങളിൽ ചിലത് അന്തിമ ഘട്ടത്തിൽ എത്തി നിൽക്കുന്ന സാഹചര്യത്തിൽ വാക്സിൻ വിതരണം സംബന്ധിച്ച കാര്യങ്ങളും യോഗത്തിൽ ചർച്ച ചെയ്യുമെന്നാണ് കരുതുന്നത്. വാക്സിനുകൾക്ക് അടിയന്തിര അംഗീകാരം നൽകുന്നതുമായി ബന്ധപ്പെട്ടും യോഗത്തിൽ ചർച്ചകൾ നടക്കും.
കഴിഞ്ഞ ദിവസം നടന്ന നീതി ആയോഗിന്റെ യോഗത്തിൽ വാക്സിനുകൾക്ക് അടിയന്തിര അംഗീകാരം നൽകുന്നതുമായി ബന്ധപ്പെട്ട് ചർച്ചകൾ നടന്നിരുന്നു. വാക്സിന്റെ വില, സമ്പാദനം തുടങ്ങിയ കാര്യങ്ങളും യോഗത്തിൽ ചർച്ച ചെയ്തിരുന്നു. ഫൈസർ, മോഡേണ തുടങ്ങിയ കമ്പനികളുടെ കോവിഡ് വാക്സിൻ പരീക്ഷണങ്ങൾ വിജയകരമാണെന്ന റിപ്പോർട്ടുകൾ വന്ന സാഹചര്യത്തിലായിരുന്നു ഇത്.
Read also: പോപ്പുലർ ഫിനാൻസ് കേസ്; അന്വേഷണം സിബിഐക്ക് കൈമാറി