തിരുവനന്തപുരം: കോവിഡ് മൂലം അടച്ചിട്ടിരുന്ന ശ്രീ പദ്മനാഭ സ്വാമി ക്ഷേത്രത്തില്‍ ഭക്തര്‍ക്ക് പ്രവേശന അനുമതി നല്‍കാന്‍ തീരുമാനം. ബുധനാഴ്ച്ച മുതല്‍ ക്ഷേത്രത്തില്‍ ഭക്തരെ അനുവദിക്കും. രാവിലെ 8.30 മുതല്‍ 11 വരെയാണ് പ്രവേശനം അനുവദിച്ചിരിക്കുന്നത്. വൈകുന്നേരം 5 മുതല്‍ ദീപാരാധനയുടെ സമയം വരെയും ഭക്തര്‍ക്ക് ക്ഷേത്രത്തില്‍ പ്രവേശിക്കാം. തലേദിവസം മുന്‍കൂട്ടി ബുക്ക് ചെയ്യുന്നവര്‍ക്കാണ് പ്രവേശനം അനുവദിക്കുക. ഒരേ സമയം 35 പേര്‍ക്ക് മാത്രമേ ക്ഷേത്രത്തില്‍ പ്രവേശനം അനുവദിക്കുകയുള്ളു.
കോവിഡ് പശ്ചാത്തലത്തില്‍ സംസ്ഥാനത്തെ മുഴുവന്‍ ക്ഷേത്രങ്ങളും അടച്ചിരുന്നു. എന്നാല്‍, തിരുവിതാംകൂര്‍ ദേവസ്വം ബോര്‍ഡിന് കീഴിലുള്ള ശബരിമല ഒഴികെയുള്ള ക്ഷേത്രങ്ങളില്‍ കഴിഞ്ഞയാഴ്ച്ച മുതല്‍ ഭക്തര്‍ക്ക് നിയന്ത്രണങ്ങളോടെ പ്രവേശനം അനുവദിച്ചിരുന്നു.
