കോട്ടയം: അന്തരിച്ച പ്രശസ്ത തിരക്കഥാകൃത്തും സംവിധായകനുമായ ഡെന്നീസ് ജോസഫിന്റെ സംസ്കാരം ഇന്ന് മൂന്ന് മണിക്ക് നടക്കും. കോട്ടയം ഏറ്റുമാനൂർ സെന്റ് സെബാസ്റ്റ്യൻ പള്ളിയിലാണ് ചടങ്ങുകൾ. മലയാളത്തിലെ എക്കാലത്തെയും സൂപ്പർഹിറ്റ് ചിത്രങ്ങളുടെ തിരക്കഥാകൃത്തായ ഡെന്നീസ് ഇന്നലെ രാത്രിയാണ് അന്തരിച്ചത്. കുഴഞ്ഞുവീണ അദ്ദേഹത്തെ കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരണം സംഭവിക്കുകയായിരുന്നു.
നിറക്കൂട്ട്, രാജാവിന്റെ മകൻ, ന്യൂഡെൽഹി, മനു അങ്കിൾ, നമ്പർ 20 മദ്രാസ് മെയിൽ, കോട്ടയം കുഞ്ഞച്ചൻ, ആകാശദൂത് തുടങ്ങി ഒട്ടേറെ ഹിറ്റുകൾക്ക് തിരക്കഥ ഒരുക്കിയത് ഇദ്ദേഹമായിരുന്നു. അഗ്രജൻ, അപ്പു, അഥർവം, മനു അങ്കിൾ എന്നീ ചിത്രങ്ങൾ സംവിധാനം ചെയ്യുകയും ചെയ്തു.
സംവിധായകൻ ജോഷിക്ക് വേണ്ടിയാണ് ഏറ്റവും കൂടുതൽ ചിത്രങ്ങൾക്ക് തിരക്കഥ ഒരുക്കിയത്. അതെല്ലാം തന്നെ സൂപ്പർ ഹിറ്റുകളുമായിരുന്നു. ആദ്യമായി സംവിധാനം ചെയ്ത മനു അങ്കിൾ എന്ന ചിത്രത്തിലൂടെ ദേശീയ പുരസ്കാരവും ഇദ്ദേഹത്തിന് ലഭിച്ചിട്ടുണ്ട്. ഭാര്യ: ലീന, മക്കൾ: എലിസബത്ത്, റോസി, ജോസ്.
Also Read: ജനപ്രിയ സിനിമകളുടെ ശില്പി; ഡെന്നീസ് ജോസഫിന്റെ നിര്യാണത്തില് അനുശോചിച്ച് മുഖ്യമന്ത്രി