മോഹൻലാലിനെ നായകനാക്കി ജിത്തു ജോസഫ് സംവിധാനം ചെയ്‌ത സൂപ്പർഹിറ്റ് ചിത്രം ‘ദൃശ്യം 2‘ ഹിന്ദിയിലേക്ക്. പനോരമ സ്‌റ്റുഡിയോസാണ് ചിത്രത്തിന്റെ ഹിന്ദി പതിപ്പിന്റെ റീമേക്ക് അവകാശം സ്വന്തമാക്കിയത്. എത്രയാണ് തുകയെന്ന് ഇതുവരെയും വെളിപ്പെടുത്തിയിട്ടില്ല. ദൃശ്യം 2വിന്റെ തെലുങ്കു പതിപ്പിന്റെ ചിത്രീകരണം പുരോഗമിക്കവെയാണ് പുതിയ വാർത്തകൾ വരുന്നത്.
ദൃശ്യം ഒന്നാം ഭാഗം ഹിന്ദിയില്‍ സൂപ്പര്‍ഹിറ്റ് ആയിരുന്നു. അജയ് ദേവ്ഗണ്‍, തബു, ശ്രിയ സരണ്‍ എന്നിവരായിരുന്നു ഇതിൽ കേന്ദ്ര കഥാപാത്രങ്ങളെ അവതരിപ്പിച്ചത്. ഇവര്‍ തന്നെയായിരിക്കും രണ്ടാം ഭാഗത്തിലും എത്തുകയെന്നാണ് സൂചന. നിഷികാന്ത് കാമത്ത് ആണ് ദൃശ്യം ആദ്യപതിപ്പ് ഒരുക്കിയത്.
ഫെബ്രുവരി 19നാണ് ‘ദൃശ്യം 2‘ ആമസോണ്‍ പ്രൈമിലൂടെ പ്രേക്ഷകർക്ക് മുൻപിലെത്തിയത്. മോഹന്‍ലാലിന്റെ ജോര്‍ജുകുട്ടി എന്ന കഥാപാത്രത്തിന് വലിയ സ്വീകാര്യതയാണ് വീണ്ടും ചിത്രത്തിലൂടെ ലഭിച്ചത്. സംവിധായകൻ ജിത്തു ജോസഫിനും ഒരുപാട് പ്രശംസ ലഭിച്ചിരുന്നു. മീന, അന്‍സിബ, സിദ്ദീഖ്, ആശ ശരത്, മുരളി ഗോപി എന്നിവരാണ് മറ്റ് വേഷങ്ങളിൽ എത്തിയത്.
