ന്യൂഡെൽഹി: ഉത്തർപ്രദേശിൽ ടോൾ ബൂത്തുകൾ പിടിച്ചെടുത്ത് കർഷകരുടെ പ്രതിഷേധം. ഡെൽഹി അതിർത്തിയിൽ ടോൾ പ്ളാസകൾ കർഷകർ പിടിച്ചെടുക്കുന്നതിന്റെ ദൃശ്യങ്ങൾ ദേശീയ മാദ്ധ്യമങ്ങൾ പുറത്ത് വിട്ടു. ടോൾ കൊടുക്കാതെ വാഹനങ്ങൾ കടത്തിവിടുന്നതും ദൃശ്യങ്ങളിൽ വ്യക്തമാണ്.
കർഷക പ്രക്ഷോഭങ്ങൾ ശക്തമായതിനെ തുടർന്ന് ഉത്തർപ്രദേശിൽ ഗൗതംബുദ്ധ നഗറിലെ ടോൾ പ്ളാസകളിൽ കർശന സുരക്ഷയാണ് ഏർപ്പെടുത്തിയിരുന്നത്. എന്നാൽ ഭാരത് കിസാൻ യൂണിയന്റെ പ്രവർത്തകർ കൂട്ടത്തോടെയെത്തി ടോൾ പ്ളാസകൾ പിടിച്ചെടുക്കുകയായിരുന്നു. ദേശീയപാത 91ലാണ് സംഭവം .
ഇതിനെ തുടർന്ന് പോലീസ് ചർച്ച നടത്തിയെങ്കിലും കർഷകർ വഴങ്ങിയില്ല. കാർഷിക നിയമങ്ങൾക്കെതിരായ സമരത്തിനിടെ ടോൾ പ്ളാസകൾ ഉപരോധിക്കുമെന്നും ട്രെയിനുകൾ തടയുമെന്നും നേരത്തെ തന്നെ കർഷകർ വ്യക്തമാക്കിയിരുന്നു. ഇതിന്റെ ഭാഗമായാണ് യുപിയിലെ ഗൗതംബുദ്ധ നഗറിലെ ടോൾ പ്ളാസകളിൽ പ്രതിഷേധം സംഘടിപ്പിച്ചത്.
Read also: നഡ്ഡക്ക് നേരെ ആക്രമണം; ഐപിഎസ് ഉദ്യോഗസ്ഥരെ തിരികെ വിളിച്ച് കേന്ദ്രം