തിരുവനന്തപുരം: പുതിയ നിയമസഭയുടെ ആദ്യ സമ്മേളനം മെയ് 24 മുതൽ ചേരും. ജൂൺ 14 വരെയാണ് സമ്മേളനം നടക്കുക. രണ്ടാം ഇടതുപക്ഷ സർക്കാരിന്റെ ആദ്യ ബജറ്റ് ജൂൺ നാലിന് രാവിലെ 9 മണിക്ക് ധനമന്ത്രി കെഎൻ ബാലഗോപാൽ അവതരിപ്പിക്കും. വോട്ട് ഓൺ കൗണ്ടും ഇതോടൊപ്പം അവതരിപ്പിക്കും.
പുതിയ സർക്കാരിന്റെ നയപ്രഖ്യാപനം മെയ് 28ന് രാവിലെ ഗവർണർ നടത്തും. മുൻ ധനമന്ത്രി തോമസ് ഐസക്കിന്റെ ബജറ്റിൽ കൂട്ടിച്ചേർക്കലുകൾ നടത്തിയാകും കെഎൻ ബാലഗോപാൽ തന്റെ കന്നി ബജറ്റ് അവതരിപ്പിക്കുക എന്നാണ് സൂചന. കോവിഡ് മഹാമാരിയെ തുടർന്ന് ധനപ്രതിസന്ധി രൂക്ഷമായ ഘട്ടത്തിലെ കേരള ബജറ്റ് ഏറെ വെല്ലുവിളികൾ നിറഞ്ഞതായിരിക്കും.
വരുമാനത്തിലുണ്ടായ ഗണ്യമായ കുറവും പെരുകുന്ന കടവും കോവിഡ് മൂലമുണ്ടായ ആഘാതവും തകർത്ത സംസ്ഥാനത്തിന്റെ സാമ്പത്തിക മേഖലയെ കരകയറ്റുക എന്ന വലിയ ദൗത്യമാണ് ധനമന്ത്രിയെ കാത്തിരിക്കുന്നത്.
Also Read: എറണാകുളത്ത് കോവിഡ് വ്യാപനം കുറയുന്നു; ലോക്ക്ഡൗൺ ഫലപ്രദമെന്ന് മന്ത്രി പി രാജീവ്