പനാജി: ഗോവ മുഖ്യമന്ത്രി പ്രമോദ് സാവന്തിന് കോവിഡ് പോസിറ്റീവ്. രോഗലക്ഷണങ്ങള്‍ ഒന്നുംതന്നെ ഉണ്ടായിരുന്നില്ല, അതിനാല്‍ ഹോം ഐസൊലേഷന്‍ ആണ് സാവന്ത് തിരഞ്ഞെടുത്തിരിക്കുന്നത്. രോഗവിവരം അദ്ദേഹം ട്വിറ്ററിലൂടെയാണ് അറിയിച്ചത്.
I wish to inform all that I have been detected COVID19 positive. I am asymptomatic and hence have opted for home isolation. I shall continue to discharge my duties working from home. Those who have come in my close contact are advised to take the necessary precautions.
— Dr. Pramod Sawant (@DrPramodPSawant) September 2, 2020
ഔദ്യോഗിക ജോലികള്‍ വീട്ടിലിരുന്ന് നിര്‍വഹിക്കുമെന്നും അദ്ദേഹം വ്യക്തമാക്കി. താനുമായി അടുത്തിടപഴകിയവര്‍ മുന്‍കരുതലുകളെടുക്കണമെന്നും നിര്‍ദ്ദേശിച്ചു. കഴിഞ്ഞ ദിവസങ്ങളില്‍ സംസ്ഥാനത്തെ ആരോഗ്യ മന്ത്രിയുമായും റവന്യൂ മന്ത്രിയുമായും പ്രമോദ് സാവന്ത് കൂടിക്കാഴ്ച നടത്തിയിരുന്നു.
കര്‍ണാടക മുഖ്യമന്ത്രി യദിയൂരപ്പ, മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാന്‍, ഹരിയാന മുഖ്യമന്ത്രി മനോഹര്‍ ലാല്‍ ഖട്ടര്‍ എന്നിവര്‍ക്ക് ശേഷം കോവിഡ് സ്ഥിരീകരിക്കുന്ന നാലാമത്തെ മുഖ്യമന്ത്രിയാണ് പ്രമോദ് സാവന്ത്. ഗോവയില്‍ 18,006 കോവിഡ് പോസിറ്റീവ് കേസുകളാണ് ഇത് വരെ റിപ്പോര്‍ട്ട് ചെയ്തത്. ഇതില്‍ 13,850 പേര്‍ രോഗമുക്തി നേടി. നിലവില്‍ 3,962 പേരാണ് ചികിത്സയിലുള്ളത്. രണ്ട് മരണങ്ങളും റിപ്പോര്‍ട്ട് ചെയ്തിട്ടുണ്ട്.
