പ്രമുഖ ഓൺലൈൻ പേമെന്റ് സേവനദാതാക്കളായ ഗൂഗിൾപേ, ഫോൺപേ എന്നിവ ഓട്ടോ ഡബിറ്റ് സംവിധാനം ഉടൻ അവതരിപ്പിക്കുമെന്ന് റിപ്പോർട്ടുകൾ. ഒരു മാസത്തിനുള്ളിൽ പുതിയ ഫീച്ചറുകൾ നിലവിൽ വരാനുള്ള സാധ്യതകളാണ് ഇവരുമായി അടുത്ത വൃത്തങ്ങൾ മുന്നോട്ട് വക്കുന്നത്. ഈ സംവിധാനം നിലവിൽ വരുന്നതോടെ തവണകളായി അടക്കേണ്ട തുകകൾ ഉൾപ്പെടെ മുൻകൂട്ടി തീരുമാനിച്ച തീയതികൾക്കുള്ളിൽ അടയ്കുവാൻ കഴിയും. ഇതിനായി എല്ലാ മാസവും പ്രത്യേക പേമെന്റ് നടത്തേണ്ടതില്ല, ബാങ്ക് അക്കൗണ്ടിൽ പണത്തിന്റെ ലഭ്യത ഉറപ്പാക്കിയാൽ മാത്രം മതിയാവും.
കഴിഞ്ഞ കുറച്ചു കാലങ്ങളായി ഇതിനുള്ള ഒരുക്കങ്ങൾ നടന്നു വരികയായിരുന്നു. കോവിഡ് പശ്ചാത്തലത്തിൽ ഇടപാടുകൾക്കായി കൂടുതൽ പേരും ഡിജിറ്റൽ ബാങ്കിങിനെ ആശ്രയിച്ചു തുടങ്ങിയതോടെ പെട്ടെന്ന് തന്നെ ഈ ഫീച്ചർ പ്രവർത്തനക്ഷമമാക്കാൻ തയ്യാറെടുക്കുന്നതായാണ് റിപ്പോർട്ടുകൾ. നേരത്തെ സ്റ്റേറ്റ് ബാങ്ക് ഓഫ് ഇന്ത്യ, ആക്സിസ് ബാങ്ക്, എച്ച് ഡി എഫ് സി തുടങ്ങിയ ബാങ്കുകളെ ഉൾപ്പെടുത്തി നാഷണൽ പേയ്‌മെന്റ്സ് കോർപ്പറേഷൻ ഓഫ് ഇന്ത്യ ഈ സംവിധാനം നടപ്പിലാക്കിയിരുന്നു. ഏകദേശം 60 ലക്ഷത്തിലധികം ഉപഭോക്താക്കളെ ഉൾക്കൊള്ളുന്ന രണ്ട് സേവനദാതാക്കളും ഈ സൗകര്യം ഏർപ്പെടുത്തകയാണെങ്കിൽ വൻ വിപ്ലവമാകുമെന്നാണ് വിലയിരുത്തൽ.
