ന്യൂഡെൽഹി: രാജ്യത്തെ ജിഎസ്ടി വരുമാനം വീണ്ടും ഒരുലക്ഷം കോടി കടന്നു. ജൂലൈ മാസത്തെ ജിഎസ്ടി വരുമാനം 1,16,393 കോടി രൂപയാണെന്ന് കേന്ദ്ര ധനമന്ത്രാലയം അറിയിച്ചു. കഴിഞ്ഞ വർഷം ഇതേമാസത്തെ അപേക്ഷിച്ച് 33 ശതമാനം വർധനവാണ് നികുതി വരുമാനത്തിൽ ഉണ്ടായിരിക്കുന്നത്.
സിജിഎസ്ടി 22,197 കോടിയും, എസ്ജിഎസ്ടി 28,541 കോടിയുമാണ് ഇതിൽ ഉൾപ്പെടുന്നത്. 57,864 കോടി രൂപയാണ് ഐജിഎസ്ടി (ചരക്ക് ഇറക്കുമതിയുമായി ബന്ധപ്പെട്ട 27,900 കോടി ഉൾപ്പെടെ) സെസ് ഇനത്തിൽ 7,790 കോടി (ചരക്ക് ഇറക്കുമതിയുടെ ഭാഗമായി ലഭിച്ച 815 കോടി ഉൾപ്പെടെ) എന്നിങ്ങനെയാണ് കൃത്യമായ കണക്കുകൾ.
2021 ജൂലൈ ഒന്ന് മുതൽ ജൂലൈ 31 വരെ സമർപ്പിച്ച ജിഎസ്ടിആർ-3 ബി റിട്ടേണുകളിൽ നിന്ന് ലഭിച്ച ജിഎസ്ടി വരുമാനവും, അതേ കാലയളവിൽ ഇറക്കുമതിയിൽ നിന്ന് ശേഖരിച്ച ഐജിഎസ്ടിയും സെസും ഉൾപ്പെടുന്നതാണ് ആകെ നികുതി വരുമാനം.
കഴിഞ്ഞ വർഷം ഇതേ മാസത്തേക്കാൾ ചരക്ക് ഇറക്കുമതിയിൽ നിന്നുള്ള വരുമാനം 36 ശതമാനം കൂടുതലാണ് ഇക്കുറി ഉണ്ടായിരിക്കുന്നത്. കോവിഡ് ലോക്ക്ഡൗൺ നിയന്ത്രണങ്ങൾ ലഘൂകരിച്ച സാഹചര്യത്തിലാണ് ജൂലൈയിൽ വരുമാനം ഒരുലക്ഷം കോടി കടന്നത്. ഉയർന്ന ജിഎസ്ടി വരുമാനം വരും മാസങ്ങളിലും തുടരാൻ സാധ്യതയുണ്ടെന്നാണ് സാമ്പത്തിക നിരീക്ഷകർ വിലയിരുത്തുന്നത്.
Read Also: ഫസ്റ്റ് ലുക്ക് പോസ്റ്ററുമായി ‘എഗൈൻ ജിപിഎസ്’; സൗഹൃദങ്ങളുടെ ത്രില്ലർ കഥ