തിരുവനന്തപുരം: സംസ്ഥാനത്ത് ഇന്നും ശക്തമായ മഴ തുടരുമെന്ന് മുന്നറിയിപ്പ്. പാലക്കാട്, കാസർഗോഡ് ഒഴികെയുള്ള ജില്ലകളിൽ ശക്തമായ കാറ്റിനും സാധ്യതയെന്ന് കേന്ദ്ര കാലാവസ്ഥാ വകുപ്പ് അറിയിച്ചു. പത്തനംതിട്ട, കോട്ടയം, ഇടുക്കി ജില്ലകളിൽ ഓറഞ്ച് അലർട് പ്രഖ്യാപിച്ചിരിക്കുകയാണ്.
ഇന്നലെ രാത്രി പലയിടങ്ങളിലും വ്യാപക മഴയാണ് ഉണ്ടായത്. മൂന്നാർ അഞ്ചാംമൈലിൽ മണ്ണിടിഞ്ഞു. പാലക്കാടും മലപ്പുറത്തും വിവിധയിടങ്ങളിൽ നേരിയ ഉരുൾപൊട്ടലുണ്ടായി. നാടുകാണി ചുരം വഴിയുള്ള യാത്ര നിരോധിച്ചിരിക്കുകയാണ്. അട്ടപ്പാടി ചുരം വഴിയുള്ള രാത്രിയാത്രക്കും വിലക്കുണ്ട്.
ഇടുക്കി ഡാമിൽ ജലനിരപ്പ് കൂടി. മാട്ടുപ്പെട്ടി ഡാമിന്റെ ഷട്ടറുകൾ കൂടുതൽ ഉയർത്തുമെന്നാണ് വിവരം. അതിരപ്പിള്ളി, വാഴച്ചാൽ വിനോദസഞ്ചാര കേന്ദ്രങ്ങൾ വീണ്ടും അടച്ചു. തെക്കൻ തമിഴ്നാടിനടുത്ത് രൂപമെടുത്ത ചക്രവാത ചുഴിയാണ് മഴ വ്യാപകമാകാൻ കാരണമായത്. ഞായറാഴ്ച വരെ സംസ്ഥാനത്ത് മഴ തുടരും.
Also Read: എംവിഡിയ്ക്ക് എതിരായ ഹരജി; ഇ- ബുൾ ജെറ്റിന് ഹൈക്കോടതിയില് തിരിച്ചടി