ന്യൂഡെൽഹി : റിപ്പബ്ളിക് ദിനത്തിൽ ചെങ്കോട്ടയിൽ നടന്ന സംഘർഷത്തിൽ ഒരാൾ കൂടി അറസ്‌റ്റിൽ. സംഘർഷവുമായി ബന്ധപ്പെട്ട് പ്രതിചേർക്കപ്പെട്ടിരുന്ന ഇക്ബാൽ സിംഗാണ് അറസ്‌റ്റിലായത്. ഡെൽഹി പോലീസ് സ്‌പെഷ്യൽ സെല്ലിന്റെ നേതൃത്വത്തിൽ പഞ്ചാബിലെ ഹോശിയാർപുരിൽ നിന്നാണ് ഇക്ബാൽ സിംഗിനെ അറസ്‌റ്റ് ചെയ്‌തത്‌.
കാർഷിക നിയമങ്ങൾക്കെതിരെ റിപ്പബ്ളിക് ദിനത്തിൽ നടത്തിയ പ്രതിഷേധ ട്രാക്‌ടർ റാലിക്കിടെ ഒരു സംഘം ചെങ്കോട്ടയിൽ അതിക്രമിച്ചു കടന്ന് സിഖ് പതാക ഉയർത്തിയിരുന്നു. ഇതിനെ തുടർന്ന് സംഭവവുമായി ബന്ധപ്പെട്ട് നിരവധി പേരെ പോലീസ് പ്രതി ചേർത്തിരുന്നു. തുടർന്ന് ഇക്ബാൽ സിംഗിനെ പോലീസ് അന്വേഷിച്ചു വരികയായിരുന്നു. ഇക്ബാൽ സിംഗിനെ സംബന്ധിച്ച് വിവരം നൽകുന്നവർക്ക് ഡൽഹി പോലീസ് അൻപതിനായിരം രൂപ പാരിതോഷികം പ്രഖ്യാപിക്കുകയും ചെയ്‌തിരുന്നു.
ചെങ്കോട്ടയിൽ നടന്ന സംഘർഷവുമായി ബന്ധപ്പെട്ട് പഞ്ചാബി നടൻ ദീപ് സിദ്ദുവിനെ നേരത്തെ തന്നെ ഡൽഹി പോലീസിന്റെ സ്‌പെഷ്യൽ സെൽ അറസ്‌റ്റ് ചെയ്‌തിരുന്നു. ദീപ് സിദ്ദുവിന്റെ നേതൃത്വത്തില്‍ സമരം അട്ടിമറിക്കാനുള്ള നീക്കത്തിന്റെ ഭാഗമായിട്ടാണ് അക്രമം നടത്തിയതെന്നാണ് കര്‍ഷക സംഘടനകള്‍ ആരോപിക്കുന്നത്.
Read also : ‘അഭിമാനിയായ സമരജീവി’; പ്രധാനമന്ത്രിക്ക് പി ചിദംബരത്തിന്റെ മറുപടി
