വാസ്കോ: ഐഎസ്എല്ലിൽ കരുത്തരായ മുംബൈ സിറ്റി എഫ്സി ഇന്ന് ഹൈദരാബാദ് എഫ്സിയെ നേരിടും. പത്ത് കളിയില് എട്ടിലും ജയിച്ച് 25 പോയിന്റുമായി ലീഗില് ഒന്നാമതാണ് അവര്. സിറ്റി ഗ്രൂപ്പ് ഏറ്റെടുത്ത ശേഷമുള്ള സീസണിൽ മികച്ച പ്രകടനം തന്നെയാണ് മുംബൈ പുറത്തെടുക്കുന്നത്. അതേസമയം ഹൈദരാബാദും ഇക്കുറി മികച്ച ഫോമിലാണ്. നാല് ജയവും മൂന്ന് വീതം സമനിലയും തോല്വിയുമായി പതിനഞ്ച് പോയിന്റുമായി നാലാം സ്ഥാനത്താണ് അവര്.
ആദ്യ കളിയിലെ തോൽവിക്ക് ശേഷം സീസണിൽ സ്വപ്ന തുല്യമായ മുന്നേറ്റമാണ് മുംബൈ സിറ്റി നടത്തി കൊണ്ടിരിക്കുന്നത്. സ്പാനിഷ് കോച്ച് സെർജിയോ ലൊബേറക്ക് കീഴിൽ മികച്ച ഒത്തിണക്കത്തോടെ കളിക്കുന്ന മുംബൈയെ കീഴടക്കുന്നത് ഹൈദരാബാദിന് എളുപ്പമാവില്ല. പതിനേഴ് തവണയാണ് മുംബൈ താരങ്ങള് എതിരാളികളുടെ വലയില് പന്തെത്തിച്ചത്. എന്നാൽ വെറും നാല് ഗോളുകൾ മാത്രമാണ് അവർ വഴങ്ങിയത്.
ഹൈദരാബാദ് 15 ഗോള് നേടിയെങ്കിലും പതിമൂന്ന് ഗോള് വഴങ്ങി. നിഖില് പൂജാരി, ഫ്രാന് സാന്ഡാസ, സുബ്രത പോള്, സൗവീക് ചക്രവര്ത്തി എന്നിവരുടെ അഭാവം ഹൈദരാബാദിന് തിരിച്ചടിയാവും. ഇരുടീമുകളും ആദ്യ പാദത്തില് ഏറ്റുമുട്ടിയപ്പോള് മുംബൈ എതിരില്ലാത്ത രണ്ട് ഗോളിന് ജയിച്ചിരുന്നു. വൈകീട്ട് ഏഴരക്കാണ് മൽസരം.
Read Also: വിവാദങ്ങൾക്ക് വിട; ‘വർത്തമാനം’ റിലീസിനൊരുങ്ങുന്നു