കാസര്‍ഗോഡ്: കോടതിയില്‍ കീഴടങ്ങാന്‍ നീക്കം ആരംഭിച്ച് ജ്വല്ലറി നിക്ഷേപ തട്ടിപ്പ് കേസിലെ ഒന്നാംപ്രതി പൂക്കോയ തങ്ങള്‍. ചോദ്യം ചെയ്യലിന് ഹാജരാകാതെ വന്നതോടെയാണ് ജ്വല്ലറി മാനേജിംഗ് ഡയറക്‌ടര്‍ ടികെ പൂക്കോയ തങ്ങള്‍ ഒളിവില്‍ പോയെന്ന ആക്ഷേപമുയര്‍ന്നത്. ഇയാൾ നാളെ കീഴടങ്ങും എന്നാണ് ലഭിക്കുന്ന വിവരം.
അന്വേഷണ സംഘം എംസി കമറുദ്ദീന്റെ അറസ്‌റ്റ് രേഖപ്പെടുത്തിയതിന് പിന്നാലെയാണ് പൂക്കോയ തങ്ങൾ ഒളിവിൽ പോയതായി വാർത്തകൾ വന്നത്. തുടർന്ന് തങ്ങള്‍ക്കായി അന്വേഷണ സംഘം തിരച്ചില്‍ ഊര്‍ജിതമാക്കിയിരുന്നു. ഇതിനിടെയാണ് കേസില്‍ ഒന്നാം പ്രതിയായ പൂക്കോയ തങ്ങള്‍ കോടതിയില്‍ കീഴടങ്ങാന്‍ നീക്കം ആരംഭിച്ചത്. നാളെ ഹൊസ്ദുര്‍ഗ് കോടതിയില്‍ കീഴടങ്ങും എന്നാണ് അറിയുന്നത്.
Related News: ജ്വല്ലറി തട്ടിപ്പ്; പൂക്കോയ തങ്ങൾ ഒളിവിൽ; അന്വേഷണം ഊർജിതമാക്കി പോലീസ്
ഇതിനിടെ നിക്ഷേപ തട്ടിപ്പില്‍ രണ്ട് കേസുകള്‍ കൂടി രജിസ്‌റ്റര്‍ ചെയ്‌തു. ഇതോടെ ആകെ കേസുകളുടെ എണ്ണം 117 ആയി മാറി. അതേസമയം കമറുദ്ദീനെ അറുപതോളം സാക്ഷികളില്‍ നിന്നുള്ള തെളിവുകളുടെ അടിസ്‌ഥാനത്തിലാണ് പ്രത്യേക അന്വേഷണ സംഘം കേസില്‍ പ്രതിചേര്‍ത്തത്.
