അഹമ്മദാബാദ്: പഞ്ചാബിലെ ഉജ്വല വിജയത്തിന് ശേഷം ഗുജറാത്ത് പിടിക്കാനുള്ള തയ്യാറെടുപ്പിലാണ് ആം ആദ്മി പാര്ട്ടി. സംസ്ഥാനത്ത് നിയമസഭാ തിരഞ്ഞെടുപ്പ് അടുത്തു വരുന്ന സാഹചര്യത്തില് പ്രചാരണം ഊര്ജ്ജിതമാക്കാൻ ഗുജറാത്തിലെ ആദ്യ പൊതു പരിപാടിക്ക് ഡെല്ഹി മുഖ്യമന്ത്രി അരവിന്ദ് കെജ്രിവാള് തുടക്കം കുറിച്ചു.
ആദിവാസി മേഖലയായ ബറൂച്ചില് ‘ആദിവാസി സങ്കല്പ മഹാസമ്മേളനം’ എന്ന പേരില് നടത്തിയ പൊതു പരിപാടിയിലാണ് കെജ്രിവാള് പങ്കെടുത്തത്. ആദിവാസി വോട്ടുകള് ലക്ഷ്യം വെച്ച് ഇതിനോടകം ആദിവാസി സംഘടനയായ ഭാരതീയ ട്രൈബല് പാര്ട്ടി(ബിടിപി)യുമായി എഎപി സഖ്യം പ്രഖ്യാപിച്ചു കഴിഞ്ഞു.
‘രാജ്യത്തെ രണ്ട് അതിസമ്പന്നര് ഗുജറാത്തില് നിന്നുള്ളവരാണ്. രാജ്യത്തെ അതിദരിദ്രരും ഗുജറാത്തില് തന്നെയാണുള്ളത്. ബിജെപിയും കോണ്ഗ്രസും സമ്പന്നര്ക്ക് ഒപ്പമാണുള്ളത്. അവരെ കൂടുതല് സമ്പന്നരാക്കുകയാണ്. എന്നാല് കെജ്രിവാളും എഎപിയും പാവങ്ങള്ക്കുമൊപ്പമാണ്’- അരവിന്ദ് കെജ്രിവാള് പറഞ്ഞു. ഗുജറാത്തില് ബിജെപി വിരുദ്ധ വോട്ടുകള് ഏകീകരിച്ചും ബിജെപി വോട്ടുകള് ഭിന്നിപ്പിച്ചും തിരഞ്ഞെടുപ്പിനെ നേരിടാനാണ് എഎപിയുടെ നീക്കം.
Read also: മെഡിക്കല് വിദ്യാർഥികൾക്ക് ചരക് ശപഥം; കോളേജ് ഡീനിനെ പുറത്താക്കി