മാനന്തവാടി: നഗരസഭയിൽ കോവിഡ് രോഗികളുടെ എണ്ണം വർധിച്ച സാഹചര്യത്തിൽ താഴെയങ്ങാടിയിലെ കെഎസ്ആർടിസി ഡിപ്പോയിൽ യാത്രക്കാർക്ക് വിലക്ക് ഏർപ്പെടുത്തിയതോടെ പെരുവഴിയിലായി യാത്രക്കാർ. നിലവിൽ മാനന്തവാടി നഗരസഭാ സി കാറ്റഗറിയിലാണ് ഉൾപ്പെടുന്നത്. ഡിപ്പോയുടെ ഗേറ്റ് അടച്ചിട്ടിരിക്കുന്നതിനാൽ യാത്രക്കാർക്ക് ഇരിക്കാനുള്ള സൗകര്യവും ഇതോടെ ഇല്ലാതായി.
നിലവിൽ മഴയും വെയിലും കൊണ്ട് റോഡരികിൽ തന്നെ ബസിനായി കാത്തുനിൽക്കേണ്ട അവസ്ഥയിലാണ് യാത്രക്കാർ. എന്നാൽ ഡിപ്പോയുടെ സമീപമുള്ള റോഡരികിൽ മഴവെള്ളം കെട്ടികിടക്കുന്നതിനാൽ ചളി നിറഞ്ഞു യാത്രക്കാർക്ക് നിൽക്കാൻ പോലും പറ്റാത്ത സ്ഥിതിയാണ്. സമീപത്തെ കടത്തിണ്ണയിലും മറ്റും കേറി നിന്നാണ് ആളുകൾ ഇപ്പോൾ ബസ് കാത്തുനിൽക്കുന്നത്.
നഗരസഭാ ബസ് സ്റ്റാൻഡിലും ബസുകൾ പ്രവേശിക്കാറില്ലെന്ന് യാത്രക്കാർ ആരോപിച്ചു. ഇത്തരം നിയന്ത്രണങ്ങൾ മൂലം യാത്രക്കാരാണ് ബുദ്ധിമുട്ട് അനുഭവിക്കുന്നത്. അശാസ്ത്രീയമായ പരിഷ്ക്കാരങ്ങൾ അവസാനിപ്പിക്കണമെന്നാണ് യാത്രക്കാരുടെ ആവശ്യം.
Read Also: കാഞ്ഞങ്ങാട് നിന്ന് യുവാവിനെ തട്ടികൊണ്ടുപോയ സംഭവം; പ്രതികളെ റിമാൻഡ് ചെയ്തു