തിരുവനന്തപുരം: കെഎസ്ആര്ടിസിക്ക് പുതിയ 360 ബസുകള് വാങ്ങാന് ഗതാഗത വകുപ്പ് അനുമതി നല്കി. വൈദ്യുതി, സിഎന്ജി ബസുകള് വാങ്ങാനാണ് അനുമതി നല്കിയിരിക്കുന്നത്. ഫാസ്റ്റ് പാസഞ്ചര് (50 എണ്ണം), സൂപ്പര് ഫാസ്റ്റ് (310 എണ്ണം) ഉള്പ്പടെയുള്ള ബസുകള് വാങ്ങാനായി 286.50 കോടി രൂപയുടെ അനുമതിയാണ് സംസ്ഥാന സര്ക്കാര് നല്കിയിരിക്കുന്നത്.
ഇലക്ട്രിക് ബസുകള് വാങ്ങുന്നതിന് വേണ്ടി ആകെ ചിലവാകുന്ന 286.50 കോടി രൂപയില് 27.50 കോടി രൂപ കേന്ദ്രത്തില് നിന്നും സബ്സിഡി ലഭ്യമാകും. ബാക്കി തുക കിഫ്ബിയില് നിന്നും 4 ശതമാനം പലിശ നിരക്കില് വായ്പയായി ലഭിക്കും. കെഎസ്ആര്ടിസിക്ക് തുക അനുവദിക്കുമെന്ന് കിഫ്ബി നേരത്തെ തന്നെ വ്യക്തമാക്കിയിരുന്നു. ഇതിനെ തുടര്ന്നാണ് സര്ക്കാരിന്റെ നടപടി.
Read also: കടബാധ്യതയുള്ളവർക്ക് നിയമ പരിരക്ഷയൊരുക്കാൻ യുഎഇ; മലയാളികൾക്ക് ഗുണകരമാകും
തിരുവനന്തപുരത്തെ ഗ്രീന് സിറ്റിയാക്കാനുള്ള പദ്ധതിയുടെ ഭാഗമായാണ് കെഎസ്ആര്ടിസി പുതിയ ബസുകള് വാങ്ങുന്നത്. 3 വര്ഷത്തിനുള്ളില് തിരുവനന്തപുരത്ത് പൂര്ണമായും സിഎന്ജി, ഇലക്ട്രിക് ബസുകള് നടപ്പിലാക്കാനാണ് കെഎസ്ആര്ടിസി ശ്രമിക്കുന്നത്.