മലപ്പുറം : സംസ്ഥാനത്ത് മദ്യശാലകൾ അടഞ്ഞു കിടക്കുകയാണെങ്കിലും, അയൽ സംസ്‌ഥാനങ്ങളിൽ നിന്നെത്തുന്ന മദ്യം കേരളത്തിൽ സുലഭം. മലപ്പുറം ജില്ലയിലേക്ക് കർണാടകയിൽ നിന്നും വ്യാപകമായ രീതിയിൽ മദ്യം എത്തുന്നുണ്ട്. പച്ചക്കറി കയറ്റി വരുന്ന വാഹനങ്ങളിൽ ഒളിപ്പിച്ചാണ് ഇവ ജില്ലയിലേക്ക് കടത്തുന്നത്.
ജില്ലയുടെ അതിർത്തി വരെ കർണാടകയിൽ നിന്നുള്ള സംഘം മദ്യം എത്തിക്കും. തുടർന്ന് അവിടെ നിന്നും പച്ചക്കറി കയറ്റി വരുന്ന വാഹനങ്ങളിലേക്ക് മാറ്റുകയാണ് ചെയ്യുന്നത്. കർണാടകയിൽ ചെറിയ പാക്കറ്റുകളിലായി വിൽക്കുന്ന ഗുണമേൻമ കുറഞ്ഞ മദ്യമാണ് നാട്ടിലേക്ക് ഒഴുകുന്നത്. അവിടെ 35 രൂപ വരെ ഈടാക്കുന്ന മദ്യം നാട്ടിൽ എത്തിക്കുമ്പോൾ 270 രൂപ വരെ ഈടാക്കിയാണ് വിൽപന നടത്തുന്നത്.
വില കൂടുതലാണെങ്കിലും നിലവിൽ സംസ്‌ഥാനത്തെ മദ്യശാലകൾ അടഞ്ഞു കിടക്കുന്നതിനാൽ തന്നെ ഇവക്ക് ആവശ്യക്കാർ ഏറെയാണ്. ജില്ലയുടെ വിവിധ ഭാഗങ്ങളിലേക്ക് ഇത് എത്തിക്കുന്നതിനും വിൽപന നടത്തുന്നതിനും പ്രത്യേകം ആളുകളും ഉണ്ട്. മദ്യത്തിന് പുറമേ ഇത്തരത്തിൽ കഞ്ചാവ് കടത്തും രൂക്ഷമാകുന്നതായി അധികൃതർ വ്യക്‌തമാക്കുന്നു.
Read also : ഗ്രൂപ്പുകൾ ഇല്ലാതാക്കാൻ ശ്രമമെന്ന് ആക്ഷേപം; കോൺഗ്രസിൽ ചേരിതിരിവിന് സാധ്യത
