ചണ്ഡീഗഢ്: ഹരിയാനയിൽ ഏർപ്പെടുത്തിയിരുന്ന ലോക്ക്ഡൗൺ ഒരാഴ്‌ചത്തേക്ക് കൂടി നീട്ടി. ജൂൺ 21 വരെയാണ് ലോക്ക്ഡൗൺ നീട്ടിയിരിക്കുന്നത്. അതേസമയം, ലോക്ക്ഡൗണിൽ കൂടുതൽ ഇളവുകളും ഹരിയാന സർക്കാർ ഏർപ്പെടുത്തിയിട്ടുണ്ട്.
പുതിയ ഇളവുകൾ അനുസരിച്ച് മാൾ, ഹോട്ടൽ, റസ്‌റ്റോറന്റ്, ബാറുകൾ എന്നിവ രാവിലെ 10 മുതൽ രാത്രി 10 വരെ തുറക്കാൻ അനുമതി നൽകി. എന്നാൽ, പകുതി പേർക്ക് മാത്രമേ ഇവിടങ്ങളിൽ പ്രവേശനം അനുവദിക്കാവൂ. ജിമ്മുകൾക്ക് കോവിഡ് മാനദണ്ഡങ്ങൾ പാലിച്ച് രാവിലെ 6 മുതൽ രാത്രി 8 വരെ പ്രവർത്തിക്കാം. വിദ്യാഭ്യാസ സ്‌ഥാപനങ്ങൾക്ക്‌ പ്രവർത്തനാനുമതി ഇല്ല. ആരാധനാലയങ്ങളിൽ പരമാവധി 21 പേർക്ക് പ്രവേശിക്കാം. വിവാഹം, മരണാനന്തര ചടങ്ങുകൾ എന്നിവയിലും 21 പേർക്ക് പങ്കെടുക്കാം.
അതേസമയം, സംസ്‌ഥാനത്ത്‌ കോവിഡ് കേസുകൾ കുറഞ്ഞിട്ടുണ്ടെന്ന് ചീഫ് സെക്രട്ടറി അറിയിച്ചു. കഴിഞ്ഞ ദിവസം 339 പേർക്കാണ് ഹരിയാനയിൽ കോവിഡ് സ്‌ഥിരീകരിച്ചത്‌. 43 കോവിഡ് മരണങ്ങളും കഴിഞ്ഞ ദിവസം റിപ്പോർട് ചെയ്‌തിരുന്നു.
Read also: വീടുകളിൽ ഇന്ന് മുതൽ വാക്‌സിനെത്തും; രാജസ്‌ഥാനിൽ പദ്ധതിക്ക് ഇന്ന് തുടക്കം
