നീണ്ട 12 വര്‍ഷങ്ങൾക്ക് ശേഷം മോഹന്‍ലാലിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രം ‘എലോണി’ന്റെ ടീസർ പുറത്തുവിട്ടു. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രത്തിന്റെ ടീസറിന് മികച്ച പ്രതികരണമാണ് ലഭിക്കുന്നത്.
‘യഥാർഥ നായകൻമാർ എല്ലായിപ്പോഴും തനിച്ചാണ്’ എന്ന മോഹൻലാലിന്റെ ഡയലോഗ് ഉൾപ്പെടുത്തിയാണ് ടീസർ റിലീസ് ചെയ്‌തത്‌. രണ്ട് മണിക്കൂറിനുള്ളിൽ തന്നെ 39,000ൽ ഏറെ ആളുകളാണ് ടീസർ കണ്ടത്.
അതേസമയം സിനിമയിൽ മോഹൻലാൽ മാത്രമാണ് ഏക കഥാപാത്രമായി എത്തുന്നതെന്നും സൂചനയുണ്ട്.രാജേഷ് ജയറാമാണ് ചിത്രത്തിന്റെ തിരക്കഥ രചിച്ചിരിക്കുന്നത്. അഭിനന്ദൻ രാമാനുജം ഛായാഗ്രാഹകനാകുന്ന ചിത്രത്തിന്റെ എഡിറ്റർ ഡ‍ോൺമാക്‌സ് ആണ്. സംഗീതം ജേക്‌സ് ബിജോയ്.
1997ൽ പുറത്തിറങ്ങിയ സൂപ്പർ ഹിറ്റ് ചിത്രം ‘ആറാം തമ്പുരാനി’ലാണ് മോഹൻലാലും ഷാജി കൈലാസും ആദ്യമായി ഒന്നിച്ചത്. പിന്നീട് 2000ൽ ഈ കൂട്ടുകെട്ടിൽ പുറത്തിറങ്ങിയ ‘നരസിംഹ’വും തിയേറ്ററുകൾ ഇളക്കിമറിച്ചു. ഇരുവരും ഒന്നിച്ച താണ്ഡവം, നാട്ടുരാജാവ്, ബാബാ കല്യാണി തുടങ്ങിയവയും വൻ വിജയമായിരുന്നു. 2009ൽ പുറത്തിറങ്ങിയ ‘റെഡ് ചില്ലീസാ’ണ് ഷാജി കൈലാസിന്റെ സംവിധാനത്തിൽ ഒടുവിൽ പുറത്തിറങ്ങിയ മോഹൻലാൽ ചിത്രം.
Most Read: ഐപിഎൽ; കലാശപ്പോരിൽ ഇന്ന് കൊൽക്കത്തയും ചെന്നൈയും നേർക്കുനേർ
