കണ്ണൂര്‍: ജില്ലയിലെ പഞ്ചായത്തുകളില്‍ സേവനങ്ങള്‍ ഓണ്‍ലൈന്‍ വഴിയാക്കാനുള്ള പദ്ധതി ഇന്ന് ആരംഭിക്കും. പൊതുജനങ്ങള്‍ക്ക് വീട്ടിലിരുന്നു കൊണ്ട് തന്നെ പഞ്ചായത്തിലെ സേവനങ്ങള്‍ ലഭ്യമാക്കാനുള്ള പദ്ധതി ഇ-ഗവേണന്‍സ് സംവിധാനം പ്രോത്സാഹിപ്പിക്കുന്നതിന്റെ ഭാഗമായി നടപ്പിലാക്കുന്ന ഇന്റഗ്രേറ്റഡ് ലോക്കല്‍ ഗവേണന്‍സ് മാനേജ്‌മെന്റ് സിസ്റ്റത്തിന്റെ (ഐഎല്‍ജിഎംഎസ്) ജില്ലാ തല ഉദ്ഘാടനമാണ് ഇന്ന് നടക്കുന്നത്.
രാവിലെ 10.30-ന് മന്ത്രി ഇപി ജയരാജനാണ് ഉദ്ഘാടനം നിര്‍വഹിക്കുന്നത്. കല്യാശേരി ജൂബിലി ഹാളില്‍ വെച്ച് നടക്കുന്ന ചടങ്ങില്‍ ടിവി രാജേഷ് എംഎല്‍എയാണ് അദ്ധ്യക്ഷന്‍. ഓണ്‍ലൈനിലൂടെ ആയിരിക്കും മന്ത്രി ചടങ്ങില്‍ പങ്കെടുക്കുക.
ഐഎല്‍ജിഎംഎസിന്റെ സോഫ്റ്റ്‌വെയർ പ്രവര്‍ത്തനം ആരംഭിക്കുന്നത്തോടെ ഫയല്‍ കൈകാര്യം ചെയ്യുന്നതിന് ഏകീകൃത സ്വഭാവമുള്ള സംവിധാനം നിലവില്‍ വരും.
ഈ ഏകജാലക സംവിധാനത്തില്‍ ഫയലുകളും, സേവനങ്ങളും ഒറ്റ സോഫ്റ്റ്‌വെയറിലേക്ക് ചുരുക്കാന്‍ കഴിയും. ജീവനക്കാര്‍ക്കും വീട്ടിലിരുന്ന് ജോലി ചെയ്യാനുള്ള സംവിധാനം ഇതിലൂടെ ഏര്‍പ്പെടുത്താന്‍ കഴിയും. കോവിഡ് പ്രതിസന്ധി രൂക്ഷമാകുന്ന സാഹചര്യത്തില്‍ പുതിയ സംവിധാനം ജനങ്ങള്‍ക്ക് കൂടുതല്‍ ഗുണകരമാവും.
