മുംബൈ: ജയിലിലായ കുപ്രസിദ്ധ ഗുണ്ടാത്തലവൻ ലോറൻസ് ബിഷ്‌ണോയിയുടെ സഹോദരൻ അൻമോൾ ബിഷ്‌ണോയ് (25) യുഎസിലുണ്ടെന്ന് വിവരം. യുഎസ് അധികൃതർ നൽകിയ വിവരം അനുസരിച്ചു ഇയാളെ കണ്ടെത്തി ഇന്ത്യയിലെത്തിക്കാനുള്ള നീക്കങ്ങൾ മുംബൈ പോലീസ് ആരംഭിച്ചു.
ബോളിവുഡ് താരം സൽമാൻ ഖാന്റെ വീടിന് പുറത്ത് വെടിവെപ്പ് നടത്തിയത് ഉൾപ്പടെയുള്ള കേസുകളിൽ പ്രതിയാണ് അൻമോൾ. മുംബൈയിലെ പ്രത്യേക കോടതിയിൽ ഇതുസംബന്ധിച്ച ഹരജി പോലീസ് ഫയൽ ചെയ്‌തിട്ടുണ്ട്‌. ഒക്‌ടോബർ 16ന് അൻമോളെ ഇന്ത്യയിൽ എത്തിക്കണമെന്ന് കോടതിയെ അധികൃതർ അറിയിക്കുകയുംചെയ്‌തുവെന്ന്‌ ദേശീയമാദ്ധ്യമങ്ങൾ റിപ്പോർട് ചെയ്‌തു.
ഗുജറാത്തിലെ സബർമതി ജയിലിൽ കഴിയുന്ന ലോറൻസ് ബിഷ്‌ണോയിക്ക് വേണ്ടി പുറത്ത് ക്വട്ടേഷനുകൾ ഏറ്റെടുത്ത് നടപ്പാക്കുന്നത് അൻമോളാണെന്നാണ് പോലീസിന്റെ നിലപാട്. അൻമോളെ പിടികൂടാൻ സഹായിക്കുന്നവർക്ക് പത്തുലക്ഷം രൂപ ദേശീയ അന്വേഷണ ഏജൻസി (എൻഐഎ) പാരിതോഷികം പ്രഖ്യാപിച്ചിട്ടുണ്ട്.
Most Read| ജലത്തിൽ തെളിയുന്ന മഴവിൽക്കാഴ്‌ച; ഈ ചതുപ്പുകാട് മനസിന് കുളിർമയേകും
