കോഴിക്കോട്: കോഴിമുട്ടക്ക് അസാധാരണ വലുപ്പം ഉള്ളതും ഒരു മുട്ടയിൽ രണ്ട് മഞ്ഞക്കരു കണ്ടതുമായുള്ള വാർത്തകൾ ഇതിനോടകം വന്നുകഴിഞ്ഞു. എന്നാൽ ഇതിൽ നിന്നെല്ലാം വളരെ വ്യത്യസ്‌തമായ ഒരു കോഴിയുടെയും കോഴിമുട്ടയുടെയും വാർത്തയാണ് ബാലുശ്ശേരിയിൽ നിന്ന് വരുന്നത്.
ഒറ്റദിവസം 11 മുട്ടകളിട്ടാണ് ഈ നാടൻ കോഴി അൽഭുതമാകുന്നത്. കൊളത്തൂർ യുപി സ്‌കൂളിനടുത്ത് താമസിക്കുന്ന കുന്നത്ത് മീത്തൽ മനോജിന്റെ വീട്ടിലെ കോഴിയാണ് ഈ അൽഭുതം കാണിച്ചത്. വ്യാഴാഴ്‌ച രാവിലെ ഏഴു മണി മുതൽ ഉച്ചക്ക് ഒരു മണി വരെ അര മണിക്കൂർ ഇടവേളയിലാണ് കോഴി 11 മുട്ടകളിട്ടത്. 10 മുട്ടകൾ സാധാരണ വലുപ്പത്തിൽ ഉള്ളതും ഒന്ന് അൽപം വലുപ്പം കൂടുതലുള്ളതുമാണ്.
ഈ കോഴി ബുധനാഴ്‌ച രണ്ട് മുട്ടകളിട്ടിരുന്നു. നാലു മാസം മുൻപ് കപ്പുറത്തു നിന്നാണ് മനോജ് കോഴിയെ വാങ്ങിയത്. എന്തായാലും. ഒരു ദിവസം കൊണ്ട് 11 മുട്ടകളിട്ട ഈ ‘അൽഭുത കോഴി’യെ കാണാൻ നിരവധി പേരാണ് മനോജിന്റെ വീട്ടിലേക്ക് എത്തുന്നത്.
Most Read: ഡെൽഹി മെട്രോയിൽ കയറിപ്പറ്റി കുരങ്ങ്; പുറംകാഴ്‌ച കണ്ട് സൗജന്യയാത്ര; ചിരിയുണർത്തി വീഡിയോ
