തിരുവനന്തപുരം : കോണ്‍സുലേറ്റ് വഴി സ്വര്‍ണ്ണം കടത്തിയ കേസില്‍ മുഖ്യപ്രതികള്‍ ഉള്‍പ്പടെ 7 പേരുടെ റിമാന്‍ഡ് കാലാവധി നീട്ടി കോടതി ഉത്തരവിട്ടു. മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കര്‍, സ്വപ്‍ന സുരേഷ്, സരിത്, സന്ദീപ്, റമീസ്, ജലാല്‍, മുഹമ്മദ് ഷാഫി എന്നിവരുടെ റിമാന്‍ഡ് കാലാവധിയാണ് ഇപ്പോള്‍ നീട്ടിയത്. കൊച്ചിയിലെ പ്രത്യേക സാമ്പത്തിക കുറ്റവിചാരണ കോടതിയാണ് റിമാന്‍ഡ് കാലാവധി നീട്ടികൊണ്ട് ഉത്തരവ് പുറത്തിറക്കിയത്.
സ്വർണക്കടത്തുമായി ബന്ധപ്പെട്ട് കസ്‌റ്റംസ് അന്വേഷണം നടത്തുന്ന കേസുകളിലാണ് പ്രതികളുടെ റിമാന്‍ഡ് കാലാവധി നീട്ടിയത്. ഉത്തരവ് പ്രകാരം റിമാന്‍ഡ് കാലാവധി ഫെബ്രുവരി 2ആം തീയതി വരെയാണ് നീട്ടിയിരിക്കുന്നത്. സ്വര്‍ണ്ണക്കടത്ത് കേസിനൊപ്പം തന്നെ ഡോളര്‍ കടത്തുമായി ബന്ധപ്പെട്ട കേസിലും പ്രതികളുടെ റിമാന്‍ഡ് കാലാവധി നീട്ടിയിട്ടുണ്ട്. ഡോളര്‍ കടത്ത് കേസില്‍ സ്വപ്‍ന സുരേഷ്, സരിത് എന്നിവരുടെ റിമാന്‍ഡ് കാലാവധി ഫെബ്രുവരി 2 വരെ നീട്ടിയതായാണ് കോടതി ഉത്തരവിട്ടത്.
Read also : സിപിഎം പ്രവർത്തകരുടെ വീടുകൾക്കു നേരെ ആക്രമണം
