പാലക്കാട്: ചളവറ പുലിയാനാംകുന്നിൽ സിപിഎം പ്രവർത്തകരുടെ വീടുകൾക്കു നേരെ ആക്രമണം. ജില്ലാ പഞ്ചായത്ത് സ്‌ഥിരം സമിതി അധ്യക്ഷനും സിപിഎം ജില്ലാ കമ്മിറ്റി അംഗവുമായ പികെ സുധാകരന്റെ സഹോദരൻ പികെ ശശിധരന്റെ വീടിനും സമീപത്തുള്ള പരിയന്തൊടി സത്യരാജിന്റെ വീടിനും നേരെയാണ് ആക്രമണം ഉണ്ടായത്.
ഞായറാഴ്‌ച അർധരാത്രി കഴിഞ്ഞ് ബൈക്കിലെത്തിയ രണ്ടു പേർ വീടുകൾക്കു നേരെ കല്ലേറ് നടത്തുകയായിരുന്നു എന്ന് പോലീസ് പറഞ്ഞു. ബൈക്കിൽ എത്തിയവരുടെ ദൃശ്യം സിസിടിവി ക്യാമറയിൽ പതിഞ്ഞിട്ടുണ്ട്. ശശിധരന്റെ വീട്ടുമുറ്റത്തു നിർത്തിയിട്ടിരുന്ന കാറിന്റെ പിന്നിലെ ഗ്ളാസും ബോണറ്റും കല്ലേറിൽ തകർന്നു.
വീടിന്റെ ജനൽചില്ലും തകർന്നിട്ടുണ്ട്. സത്യരാജിന്റെ വീടിന്റെ ജനൽചില്ലുകളും എറിഞ്ഞു തകർത്തു. കല്ലേറ് നടക്കുന്ന സമയത്ത് രണ്ടു കുടുംബങ്ങളും വീട്ടിൽ ഉണ്ടായിരുന്നു.
ആക്രമണത്തിൽ പ്രതിഷേധിച്ച് സിപിഎം ചളവറ ലോക്കൽ കമ്മിറ്റിയുടെ നേതൃത്വത്തിൽ ഇന്നലെ വൈകിട്ട് കിഴക്കൻമുക്കിൽ പ്രകടനവും പൊതുയോഗവും നടത്തി. സംഭവത്തിൽ എസ്ഐ റോയ് ജോർജിന്റെ നേതൃത്വത്തിൽ അന്വേഷണം ഊർജിതമാക്കിയിട്ടുണ്ട്.
Malabar News: പാൽച്ചുരം പാത നവീകരിക്കുന്നു; 1.75 കോടി രൂപ അനുവദിച്ചു
