ആര്യയെ കേന്ദ്ര കഥാപാത്രമാക്കി പാ രഞ്‌ജിത്ത് സംവിധാനം ചെയ്‌ത ചിത്രം ‘സര്‍പാട്ട പരമ്പരൈ’യുടെ ട്രെയ്‌ലർ പുറത്തുവിട്ടു. സംവിധായകൻ പാ രഞ്‌ജിത്തിനും ആര്യയ്‌ക്കും പുറമെ തമിഴ് സൂപ്പർ താരം സൂര്യയും സമൂഹ മാദ്ധ്യമങ്ങളിലൂടെ പങ്കുവെച്ച ട്രെയ്‌ലറിന് മികച്ച പ്രതികരണമാണ് ലഭിക്കുന്നത്. ഇതുവരെ 6 ലക്ഷത്തിലേറെ പേരാണ് ട്രെയ്‌ലർ യൂട്യൂബിൽ കണ്ടത്.
ആമസോണ്‍ പ്രൈമില്‍ ജൂലൈ 22ന് തമിഴ്, തെലുങ്കു എന്നീ ഭാഷകളിലാണ് ചിത്രം റിലീസ് ചെയ്യുക. 80കളില്‍ ചെന്നൈയിലെ ആളുകള്‍ക്കിടയിലുള്ള ബോക്‌സിങ് താല്‍പര്യത്തെ ചുറ്റിപറ്റിയാണ് കഥ പോകുന്നത്. ചിത്രത്തില്‍ സന്തോഷ് പ്രതാപ്, ഷബീര്‍ കല്ലരക്കല്‍, ജോണ്‍ കൊക്കെന്‍ എന്നിവരും പ്രധാന വേഷങ്ങള്‍ ചെയ്യുന്നുണ്ട്. കൂടാതെ പശുപതി, കലയ്യരസന്‍ എന്നിവരും അണിനിരക്കുന്നു.
കെ 9 സ്‌റ്റുഡിയോസ് നിര്‍മിക്കുന്ന ചിത്രത്തിന്റെ ഛായാഗ്രാഹകന്‍ മുരളി ജിയാണ്. സന്തോഷ് നാരായണനാണ് ചിത്രത്തിന് ഈണം പകരുന്നത്.
അതേസമയം സുന്ദര്‍ സി സംവിധാനം ചെയ്യുന്ന ‘അരണ്‍മനൈ 3’ ആണ് ആര്യയുടെ ചിത്രീകരണം ആരംഭിച്ച പുതിയ ചിത്രം. ആനന്ദ് ശങ്കര്‍ സംവിധാനം ചെയ്യുന്ന ‘എനിമി’യിലും ആര്യ മുഖ്യവേഷം കൈകാര്യം ചെയ്യുന്നുണ്ട്.
Most Read: ഇറക്കുമതി കാറിന്റെ നികുതി; നടന്‍ വിജയ്‌ക്ക് ഒരുലക്ഷം രൂപ പിഴ
